一直有食開Yaz 避孕藥，之前比賽撞咗預定空藥嘅第一日，為咗period唔好撞比賽所以開咗包新藥食多咗一粒紅色藥，之後再照舊空翻4日，即係變咗(24+1+4) 想問下
1）咁新呢一包藥（24-1+4）嘅藥係唔係可以照食？定係因為少咗一粒要再開多一包？
2）會唔會因為咁影響咗避孕功效？
Thankssss 
Hello 你咁做去延經係冇問題嘅，之後按返正常周期咁食，都唔會因為咁而影響避孕功效。
呢到可以講少少避孕藥嘅原理，等你更加清楚係發生緊咩事。其實避孕藥係一啲含有人造荷爾蒙成份嘅藥物，食避孕藥就係吸收呢啲人造荷爾蒙，從而抑制排卵，增加子宮頸分泌物嘅粘稠度，同改變子宮內膜嘅環境。透過一直服食含有人造荷爾蒙嘅避孕藥丸，即係粉紅色個粒藥丸，就可以維持着穩定嘅荷爾蒙水平。但當停止食藥，或者食到冇荷爾蒙嘅藥丸時，即係白色個幾粒藥丸，身體嘅荷爾蒙水平就會改變，就會有出血現象，就會有「月經」出現，而呢段時間嘅月經其實正式學名就係「撤退性出血」。所以，理論上，你一路食住含有人造荷爾蒙嘅避孕藥丸，月經就一直唔會嚟，直至你停止吸收人造荷爾蒙。所以只要你延遲停止食人造荷爾蒙嘅避孕藥丸，就可以延遲經期。
所以只要當呢個周期過咗之後，你按返正常周期咁，食24粒粉紅色嘅活性藥丸，然後4粒白色非活性藥丸就冇問題。至於避孕功效，如果你係一直有食開，係已經食多過一個月以上，而只要你一直有按時咁服用，而且又冇食完之後短期內嘔吐過，基本上你身體已經好好咁建立咗避孕藥嘅避孕效果，所以係唔會受影響嘅。
不過因為你呢次唔係按照正常周期咁食，所以之後可能會有機會影響咗之後嘅月經週期，同埋可能有機會帶嚟唔同嘅副作用都係正常嘅，不過都唔係100%會發生，所以嚟緊可能就要注意一下自己嘅身體情況啦。
最後，如果你將來都打算通過食避孕藥去控制月經，或者有任何嘅疑慮，例如唔肯定點樣食先能夠控制到月經，都可以諮詢返醫護人員嘅意見，例如搵家計會或者自己家庭醫生等等。因為如果經常都打亂食藥周期，都有機會會對身體狀況帶嚟一定嘅影響，所以都會建議同醫護人員傾一傾。
希望可以幫到你 