驗孕的問題和懷孕徵兆

你好!

想請教一下有關驗孕的問題,其實是不是只要依足驗孕棒說明書指示上去做的話,只要在性行為後第十四天驗孕,就算未到月經預期那天去驗孕,(期間再沒有發生性行為)。如果真是懷孕的話,身體的HCG level 都足夠去使到驗孕棒清楚地見到有懷孕的線,而不會出現疑似水印線,那水印線連影相都見不到,是嗎?如果沒有清楚見到懷孕的線,即是沒有懷孕,是嗎?

另外,當然每個人的身體的體質不同,想請教一下懷孕的徵兆如胃酸倒流、聞到某些氣味想反胃、流啡等是否不會在預計月經前一星期這樣早就出現?

謝謝你們花時間閱讀和解答問題,等待你們回覆。

Hello

冇錯呀,喺性行為嘅第14日之後驗孕已經會有準確嘅結果架啦。因為卵子受精着床大概要6-9日,當卵子受精着床之後,身體會產生hCG。所以只要係進行性行為嘅7日後進行驗孕,就會得到初步嘅結果,而11日之後就會得到一個相對準確嘅結果,14日後嘅結果就已經好準確。

而基本上,現時市面上嘅驗孕棒都有好高嘅靈敏度同特異性,如果驗孕嘅時候有依足說明書上嘅指示正確咁使用,如果冇見到懷孕線嘅話,就即係冇懷孕。呢到都想問多少少,你見到嘅水印線係有顏色嘅線?定係類似白色咁嘅線?因為如果係白色咁嘅線嘅話都係好正常嘅。

如果你擔心結果唔準確嘅話,你都可以去信譽良好嘅藥房,或者個人護理商店,買多一隻其他牌子嘅驗孕棒,或者你都可以考慮買電子驗孕棒,咁就唔洗睇有冇兩條線,可以令你更加安心放心。

至於懷孕先兆嘅問題, 其實每個人嘅體質都唔同,好難講幾時會出現,甚至可能有人一直都都冇唔舒服。不過一般而言,如果要出現,都起碼要去到懷孕大概第四週左右先會出現,亦都有啲人可能成個懷孕周期都冇唔舒服。不過其實懷孕先兆同好多經前症狀都好相似,例如流啡,其實兩者都係一啲體內荷爾蒙變化,而令身體出現不適,所以好難透過呢樣嘢去推算自己係咪有懷孕。所以最好都係相信驗孕棒嘅結果,始終相比身體嘅徵兆,驗孕棒結果會比較客觀同準確。

如果你發現自己有胃酸倒流,或者反胃嘅症狀,都有機會可能係最近嘅飲食習慣有改變,或者係最近情緒壓力有影響,因為作嘔作悶可能未必同荷爾蒙有關,而係同情緒影響更加有關係,所以你都可以留意吓自己最近嘅狀況。如果情況真係好嚴重,甚至影響到日常生活嘅話,都會建議去睇醫生,咁就可以更加好咁了解清楚自己身體狀況。

希望可以解答到你嘅疑難。