性同女性器官詢問

Halo 唔好意思啊 又係我啊
想問多啲關於女仔嘅嘢同埋一啲性問題:pray:t4:

首先就係見好多人都話中完Covid M 都會有影響 想問係咪真係會?
我中完同男朋友有性交過 當中有用condom 完事後都有用水去睇下有冇穿 如果係冇
但係過程中有幾下佢嘅性器官唔小心滑咗出去 但因為冇開燈唔係好知condom 有冇甩咗 想問會唔會就係中完 Covid 就會影響M 同埋咁樣會唔會有咗?

同埋都想知女性嘅多囊發炎?唔係好記得個名:pray:t4: 其實會係有啲咩症狀?同埋會係咩情況出現?想了解多啲呢個:sob::rofl:

Halo​:sob::sob:

Hello

首先答咗你中完Covid會唔會影響月經先。的確,有唔少人都係確診Covid之後提到自己嘅月經出現改變,例如週期不規律或月經之間的間隔變長、經期延後、經月量改變,都有人提到可能經前症狀變得更加嚴重等等。但係都唔可以一概而論。因為每個人嘅體質都唔同,並唔係每個人都會受影響,而且即使有影響都好,每個人受嘅影響都可能會唔同。而且,其實月經本身就會受好多唔同嘅因素影響,特別係中咗covid之後身體都比較需要免疫系統康復,而且中咗嗰段時間都可能食咗某啲藥物,或者胃口有所影響等等,呢啲都可能會影響咗經期。所以如果你係啱啱好返嘅話,都可以留意下身體。

如果身體真係唔舒服,或者對於呢啲影響好困擾,或者真係Covid康復咗好耐時間但都仲係有以上嘅情況出現,都會建議睇下醫生睇下係咪後遺症同有冇得舒緩。而且除咗可能係受Covid影響之外,都可能係有其他身體問題出現,咁睇咗醫生就可以最放心啦。

然後有關會唔會有懷孕風險,其實都好難答得到你,因為你哋都唔係好清楚當時嘅情況,唔知道condom有冇甩到,如果condom係有甩咗嘅話,就會有懷孕風險嘅。不過,其實如果你男朋友係有正確咁用到安全套嘅話,即係有分啱正反面,同埋戴之前有捏住儲精囊排開空氣先再下拉,同埋有用到啱size嘅安全套,啱係太大或者太細嘅話,照道理安全套係唔會咁易甩嘅,但都唔能夠確保到真係冇甩。而如果真係甩咗,而你地甩咗之後又有繼續冇用安全套嘅情況下進行陰道交嘅話,就會有懷孕風險架啦。單憑而家嘅資訊我哋真係冇辦法判斷到有冇懷孕風險。

如果你考慮完之後真係好擔心,而又冇生育計劃嘅話,都可以考慮食事後丸作緊急避孕措施。因為事後避孕藥係香港係醫生處方藥物,所以都係要睇醫生去獲得嘅。你可以去家計會或者診所同醫生講你嘅情況,然後再由佢哋安排睇吓你是否合適去食事後藥。而事後藥有分兩隻,分別要喺性行為之後72小時內或者120小時內服用。

不過我地都唔清楚你提到嘅性行為係幾時發生。如果已經超出咗食事後藥嘅有效時間嘅話,你都可以係性行為之後嘅7-11日之後驗孕。你可以去信譽良好嘅藥房或者個人護理商店,按照驗孕棒上面嘅指示進行驗孕,7日之後就會有初步結果, 11日之後就會有準確嘅結果。

至於最後,我估你係想問多囊性卵巢症候群?其實現時醫學界都仲未有一個共識係咩原因而導致多囊性卵巢症候群,但係都有啲因素係會影響到嘅,例如血液內胰島素偏高,可能係因為遺傳或者胰島素異常或者雄激素分泌問題。佢嘅症狀會包括肥胖或體重過重、月經失調、暗瘡、多毛、脫髮、不育等等。但其實呢啲嘅症狀都有可能係其他原因導致,所以如果真係有唔舒服,或者有咩擔憂嘅話,都會建議睇返醫生了解返身體狀況。如果自己估估下,擔心太多嘅話,反而可能影響咗情緒,甚至影響身體狀況。

希望解答到你嘅疑問。

我地係1.7號性行為 諗住聽日去買驗孕棒試下:sob: