陰莖會用進廢退?

雖然我係女仔,但我都想問 :woozy_face:

如果禁慾太耐,比起一個有定期性行為嘅男性,前者嘅勃起能力/質量會唔會比較差?雖然快速眼動期嘅時候都可能會有勃起

另外想知道精子嘅質素,太耐冇射精,同埋射精相對頻繁比較,邊個嘅活動能力好啲/令女性受孕能力高啲?

定其實冇得一概而論?係因人而異?

太多又唔好 太少又唔好,要中庸?

你好呀!坊間好多傳聞經常講太耐唔用就會用唔到、廢咗,其實可以當講笑咁聽下最算。首先,男性既勃起功能係一種生理能力,只要該男士係身體功能正常,沒有任何影響性功能既生理及心理問題,佢地都有勃起能力的。唔存在禁慾就可以增強或減弱勃起能力,因為性能力係無法透過禁慾累積,性能力既強弱反而係取決於經驗、身體健康及心理狀態,所以禁慾太耐既男性唔一定勃起能力較差。如果一個禁慾太耐既男性勃起能力差,這可能跟心理因素有關,如:太耐沒有性行為,可能因此緊張而影響勃起/硬度。相反,有定期性行為嘅男性,亦可能因性行為頻繁而體力太攰,影響勃起/硬度。
至於精子嘅質素,過往亦有研究指出若長期不射精,暫存體內既精子會容易受外在環境破壞,令精子質素變差。原因係男性睾丸會持續製造精子,而精子會暫時儲存係附睾,等待射精時才排出體外。如若儲存在體內時間太長,會令到精子受環境污染、輻射、高溫及自身吸煙等不良習慣影響質量。「情況就像產品製造好之後,擺放係超市太長時間,亦較容易變壞。」所以如太耐冇射精,精子既質素係會下降的,從而影響活躍能力;而定期有射精既男性,精子係會較健康及活躍。至於如何界定適合既射精頻繁程度,就因人而定,例如根據年齡、生活習慣、性需要等,只要體能上能夠支持,又唔影響日常生活,都可以算係適合。