帶咗套但係見到有白色

頭先同女朋友做左 有帶套 但係完左見佢陰道口周圍有白色嘢 當時冇戴眼鏡冇清楚睇個套 就沖咗去 想問係潤滑殖定係精?

Hello~想問你哋做完之後有冇灌水檢查個安全套有冇穿?如果冇檢查嘅話,其實我哋好難確定係精液,定係女性陰道嘅分泌物。因為喺性行為嘅時候受到刺激,陰道為了保持濕潤,係會產生分泌物,而呢啲分泌物係黏糊狀的,經過抽插之後可能會變成白色。所以當你完事後將陰莖抽出,有可能令陰道壁的分泌物溢出,令到有啲白色嘅液體喺陰道口。至於潤滑劑通常都係透明嘅,應該唔會係白色。

如果你選用既安全套係值得信賴嘅品牌,又唔係經常轉用唔同牌子或者使用不明來歷嘅安全套,咁通常佢哋係生產嘅時候都會做足測試確保品質嘅。而如果你下體全程由插入到抽出都係勃起,而又有正確使用安全套的話,相信唔需要太擔心精液會從安全套漏出嘅。

不過,如果個套真係穿咗,咁就有機會懷孕,需要考慮服唔服用事後丸。因為事後丸係香港係需要醫生處方嘅藥物,而且有分性行為後72小時或者120小時內服用兩種,如果考慮服用嘅話,建議盡快揾醫生求診。可以選擇去家計會診所、普通私家門診或者婦科診所。愈早服用,避孕效果越高,24小時內服用最好。

當然,你都可以考慮喺性行為後11日進行驗孕。因為驗孕棒係透過檢測尿液中嘅hCG (人絨毛膜促性腺激素)含量,呢款激素會係受精卵著床後開始大量分泌,而一般受精著床呢個過程需要6-9日,所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。

今次唔記得做灌水 下次會做返 唔該你先

1個讚