求答:食避孕藥期間有出血

Hello, 我上個月經期Day1係31/12 我個日開始食Yaz. 17號晚同男朋友有性行為 佢內射. 今日19/1我發現有少少出血嘅情況. 根據我所知 如果開始食避孕藥 應該係食晒所有藥丸先會嚟m 但我宜家有啲出血 咁我應該係嚟m定係排卵期出血?如果係嚟m嘅話 我應唔應該繼續食避孕藥?定係要停藥?但我驚停藥會有bb

麻煩你哋解答我嘅問題:bowing_woman:t2:

hello你好啊

首先同你解釋返避孕藥嘅原理先,避孕藥係通過人造荷爾蒙去抑制排卵,改變子宮頸黏液嘅粘稠度,同埋改變子宮內膜環境,從而達致避孕嘅功效。所以,喺避孕藥嘅影響下,唔會好似平時月經咁,因為身體週期性荷爾蒙變化、排卵、然後未受精嘅卵子連同子宮內膜喺月經期間排出體外;服藥期間出現嘅「月經」其實係「撤退性出血」,因為無排卵,亦唔會岀現排卵期岀血依個情況。

而你喺經期頭5日開始食藥,直到17號,已經建立到避孕嘅效果,所以唔會岀現停藥就懷孕嘅情況。當然啦,大前提係服用前有徵詢醫生意見、每日準時服藥、無漏食藥,避孕成功率已經係可達99.7%。

岀血嘅原因有幾個,首先食藥初期因為身體要適應人工荷爾蒙,所以可能出現一啲副作用。例如:作嘔、輕微陰道出血、乳房脹痛、體重增加、頭暈、情緒波動、皮膚狀況改變等等。通常身體適應藥物之後副作用就會消失。身體適應藥物嘅時間因人而異,1至6個月不等。不過都需要觀察岀血情況,因為如果岀血量多咗,有可能係對你身體嚟講,依個避孕藥嘅荷爾蒙劑量唔夠,會影響避孕嘅效果。另外都想問翻每日係咪準時食藥?因為如果每日食藥時間都唔同,係會影響荷爾蒙水平,導致子宮內膜脫落。
除咗岀血量外,都可以觀察下啲血係稀定杰,如果係相杰身嘅,就有機會係因為荷爾蒙水平唔夠高而導致嘅月經。
如果係稀嘅,亦都有可能係17號嗰次嘅性行為嘅摩擦太激烈,唔小心整損咗陰道,所以就有出血嘅情況。只要暫停進行性行為,大約3-5日到,畀時間傷口復原,就ok㗎啦!
你講得無錯啊,正常應該係食完一排藥先會有月經,但因為你都係啱啱開始食藥,身體需要時間適應人工荷爾蒙,所以可以繼續食,同時觀察岀血情況,如果岀血量/顏色有變化,就需要睇醫生。

多謝你嘅解答 :smiling_face:

我食藥之前有睇說明書 說明書寫話每日要同一時間食 所以我每日大概13:10食 但有時我會因為番工太忙而遲/提早10-15分鐘食(即係大概12:50-13:25呢段時間內食)想問下係咪一定要每日都要同一時間食?早少少同遲少少食會唔會影響效果?如果遲食 最好唔好遲多過幾耐?

另外 我睇番今日出血量 其實係好少 係紙巾印下先會有少少嘅量 到夜晚基本上都冇乜 因為17號係我第一次發生性關係 我有少少出血會唔會係因為啲處女血未清晒/整損左?

再一次多謝你嘅解答:relaxed::relaxed:

一般來講,如果每天都有服用避孕藥,避孕效果係可以維持嘅,但係如果兩日之間服藥間隔超過36小時,咁因為每個人體質唔同,係可能有影響避效果嘅風險,所以都係建議每日最好定時服用。因為人體內嘅藥物濃度會依照每個人嘅代謝狀況唔同而有唔同情況,如果今日朝早食,第二日拖到夜晚先吃,中間隔咗超過36小時,咁個藥效就有可能會受到影響。因為你只係遲/提早10-15分鐘食,所以影響係唔大嘅,只要冇漏食,就唔洗擔心。不過,36小時只係一個參考數值,唔代表只要唔隔多過36小時就OK,好似我上面咁講,每個人嘅身體狀況都係唔同嘅,所以如果可以嘅話都係準時食會好啲🫶🏻。

而睇返你出血嘅情況,比較大機會係好似你咁講係

只要暫停進行性行為,保持陰部乾爽,每日清潔,大約3-5日到傷口就會復原,唔洗擔心!