事後避孕藥後月經早來,是懷孕嗎?

你好,首先多謝你地上次解答我嘅問題。
1月12日同女友性行為(起初無戴套進行過,但後期有戴番,最後冇高潮就完結)當日同第二朝早上佢已經有食到事後避孕丸postinor 2各一粒。

1月18日佢話黎經期,今日19日都有,但血量比平時少。對上個月佢黎經期係12月30日,早左好多,佢平時都會遲黎。

而且聽講受精卵著床都會出血同埋好似經期,所以想了解吓兩者嘅分別怕誤會左。

Hello~:heart:首先同你講返事後丸嘅原理先:事後丸含有高劑量人造荷爾蒙,透過唔同嘅途徑去緊急避孕,包括:抑制排卵、增加子宮頸黏液分泌令精子難以通過、改變子宮腔環境令受精卵難以著床 。而事後丸有分72/120小時兩種,而愈快服用效果愈好,唔安全嘅性行為之後24小時內服用最好。而因為事後丸係醫生處方藥物,所以喺呢度都會想問返你哋購買嘅事後丸係咪醫生處方嘅?因為如果係喺普通藥房購買嘅話,我哋未必能夠保證佢嘅藥效有發揮到作用:disappointed_relieved:

通常食完事後丸之後2~7日就會出血,但亦都有可能照原本時間正常嚟,或者遲遲都唔嚟。食完事後藥後嘅岀血係因為子宮內膜剝落所導致嘅,即使有排卵,都可以令受精卵跟住內膜一齊排出,避免懷孕,依一次嘅岀血算係月經(因為無受精卵著床),所以月經週期都可能會受影響,下一次月經嘅日期都會受影響,例如上一次月經係10月2日,10月15日使用事後避孕藥,10月17日出血,咁下次月經應為11月17日左右。不過因為食完事後藥有機會出現流啡嘅副作用,並唔計為一次月經嘅,所以如果有出血嘅話,記得要留意出血量同日數。而流啡嘅血量係好少嘅,而且流血日數較短。即係話你女朋友而家呢個情況有機會係流啡,並唔係月經。

至於著床出血係指當受精卵着床喺子宮壁嘅時候有機會造成嘅少量出血,通常只會有幾滴或者最多一塊護墊可以承載到嘅血量,而且係一次性,唔會持續地出血幾日,血嘅顏色亦會同月經嘅唔一樣。一般由受精到着床大概係性行為後六至九日就會發生。而着床性出血並唔係一個常見嘅現象,即使真係因為懷孕都係只有少部分女性會出現嘅情況。 所以暫時嚟講唔需要過分擔心嘅,可以觀察下個出血量同埋出血嘅日數先,咁應該會比較容易分辨係流啡,月經,定係着床性出血:relieved:

如果你都係好擔心,可以考慮喺性行為後11日進行驗孕。因為驗孕棒係透過檢測尿液中嘅hCG (人絨毛膜促性腺激素)含量,呢款激素會係受精卵著床後開始大量分泌,而一般受精著床呢個過程需要6-9日,所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。

最後,都想提醒翻,一次月經週期最多可以食一次事後藥 ,所以呢個月經周期剩低嘅日子,如果進行性行為嘅話都一定要做足安全措施。記住無論任何形式嘅性接觸都要全程佩戴安全套,咁先至可以保障到自己同另一半🫶🏻。

事後藥係由家庭醫生開嘅,一共兩粒每12個鐘食1粒咁樣。

即係話有機會真係月經或者係事後藥嘅副作用,咁嘅話可能都要等多幾日再驗一驗先知確實結果。

多謝你嘅解答:blush::blush:

1個讚