你好！
我12月18日黎M…之後21號去左家計會到配避孕藥食,22號食左1次,但可能副作用太勁…頭痛,第二日打番去問,姑娘叫我停藥再番去睇下,之後24號番去睇完就轉左第二隻…到今日2023年1月20，食埋第三粒白色都未黎M，咁正唔正常？
同埋想問下，我中途因為尿道炎要食抗生素，大約食到10號，11號…咁想問下係咪要重新計過7日用套啊??咁岩我食到17號個粒係白色,咁係咪要睇下一排新既再重新計過???
Hello～首先同你解釋返避孕藥嘅原理先，避孕藥係通過人造荷爾蒙去抑制排卵，改變子宮頸黏液嘅粘稠度，同埋改變子宮內膜環境，從而達致避孕嘅功效。所以，喺避孕藥嘅影響下，唔會好似平時月經咁，因為身體週期性荷爾蒙變化、排卵、然後未受精嘅卵子連同子宮內膜喺月經期間排出體外；服藥期間出現嘅「月經」其實係「撤退性出血」，即係服用活性藥物（粉紅色藥丸）期間，有荷爾蒙，而停藥/服用非活性藥丸（白色藥丸），其實冇荷爾蒙成份，而呢個荷爾蒙變化（下降）就會令到子宮內膜脫落，出現出血現象。所以得第一次服用嘅時候需要預留建立藥效嘅時間，因為唔肯定身體排咗卵未（月經同排卵期可以重疊）。之後就唔需要再喺頭一個星期配合外用嘅安全措施。
當身體適應咗藥物之後，避孕藥會令到「月經」好規律嘅，通常食第1/2𨋢白色就會嚟。 不過服藥初期（頭1-3個月）會相對唔穩定嘅 ，遲遲都唔嚟都係有可能嘅。所以現階段可以耐心等下先，而無論幾時嚟「月經」都要繼續跟返家計會姑娘嘅指示準時食藥，即係話就算食緊紅色嘅時候嚟m，都唔需要停藥，亦唔洗擔心，通常食咗3個月之後就會有改善㗎啦！
至於尿道炎嗰方面，其實任何藥物都可能影響避孕藥裏面嘅荷爾蒙效力。所以，如果食緊避孕藥嘅同時服用緊其它藥物，最好配合埋另一種避孕方式。因為服用完抗生素之後，就算隔咗幾個鐘再食避孕藥，都唔能夠保證抗生素嘅藥性唔會影響避孕藥，畢竟藥物喺體內會有半衰期嘅情況，甚至可能影響新陳代謝。不過就唔需要重新計過嘅，食緊抗生素嘅時候配合使用安全套就ok。