尋日上咗男朋友屋企玩
情到濃時就諗住試下
兩個人都係第一次
本身係經期第四日
插入咗一半 因為太痛所以就即刻掹返出嚟
返到屋企先知驚 想知道意外懷孕機會大唔大
可以參考呢個post:
“因為陰莖喺射精之前已經會分泌尿道球腺液，內含少量精子。所以當你一時興起，試過唔帶放入去幾下，就已經有懷孕嘅風險。”
“呢度都想提返你，只要性器官有直接接觸嘅話，就會有懷孕風險。就算冇插入，冇內射，純粹互相磨擦都一樣有機會懷孕。所以無論任何形式嘅性接觸都好，都要全程佩戴安全套，或者使用其他安全措施，先至可以保障到雙方嘅安全”
hello你好啊
其實只要有不安全嘅性接觸，就有懷孕風險。雖然無射精，但陰莖喺射精之前已經會分泌尿道球腺液，內含少量精子，喺無用安全措施嘅情況下已經有懷孕嘅風險。即使發生性行為時，你係經期第四日，但都會有懷孕風險。因為排卵時間有機會同月經重疊，再加上精子可以喺體內存活3~5天，所以卵子同精子有機會結合。因為依加已經過咗食事後藥嘅有效時間，如果你擔心嘅話，可以考慮驗孕，最後一次性行為7日後驗孕會有初步結果，而11日後驗孕，會有相對準確嘅結果。
如果唔想懷孕，安全措施係好重要！例如安全套、避孕藥、子宮環等，喺使用荷爾蒙避孕法（避孕藥、子宮環等）前，都建議睇醫生先，評估你身體狀況係咪適合。係到都想分享點樣正確使用安全套，可以參考我地ig post： https://www.instagram.com/p/B4EX0FVFLUf/ 另外，都可以用潤滑劑，可以增加性愛時嘅舒適感，令你無咁痛外，仲可以大大減低安全套破裂嘅機會，不過只有水性同埋矽性潤滑劑可以同乳膠安全套一齊使用，油性潤滑劑係侵蝕乳膠，令安全套容易破裂。
明白第一次可能比較緊張，亦唔習慣有外物插入嘅感覺，所以會好痛。除咗用潤滑劑外，亦都可以慢慢嚟，唔一定要即刻用陰莖插入，可以練習下令外物進入陰道，例如可以嘗試先用一隻手指慢慢插入陰道，當覺得OK之後就慢慢增加手指嘅數量，慢慢試下令陰道擴張。你地仲可以慢慢試吓唔同角度或者頻率嘅抽插，去搵出合適自己嘅方法。
無論係咩形式嘅性行為都好，都需要全程使用安全指施，先最有效咁避免懷孕。除咗唔發生性行為外，無一個安全指施可以100%避孕，所以希望可以諗下性行為對你同另一半嚟講有咩意義？性行為喺一段關係中代表住啲咩？大家嘅關係更進一步？除咗準備安全指施外，喺發生性行為前都需要做好心理準備，清楚知道自己嘅意願。
希望以上資訊幫到你！