好驚有bb😭

同男友都已成年,1/9嘅時候同男友無套性行為,佢有插入,但無射到,因為驚最後都係用手幫佢解決,但其實咁樣係咪都好大機會有?然後係1/16同男友發生性行為,期間有戴套,但完左之後發現套套甩左係入面:sob:我諗應該都有少少精液流左入去…加上我自己有check個日係危險期:sob:之後17號朝早即刻去左啲私家門診買事後丸食,係24小時內服藥,醫生同聽人講會有好多副作用,例如嘔、頭痛等等,但我一啲反應都無,所以我就有啲驚。加上網爬左好多文睇話會流啲啡色嘅血,但我都係無….宜家有啲不安好無助。之後我平時排卵期前會有一兩日覺得下腹脹痛同好多分泌物,我上網睇話係正常的,但我最近呢幾日19-21號都有感到下腹脹痛同分泌物有啲多,呢啲會唔會係事後丸嘅副作用?但其實我睇app我呢幾日已經過了排卵期(宜家係黃體期,預測排卵期嘅後一兩日)。另外,會唔會係危險期食左事後都會有機會中?同埋其實都好驚診所比我嘅唔係事後丸:sob::sob:

Hello~:heart:首先,陰莖係射精之前已經會分泌尿道球腺液,內含少量精子,所以係有懷孕風險嘅。雖然風險比內射細,但都有一定機率會導致懷孕。而都想俾你知,女性每個月嘅月經周期都係唔規律嘅,所以單憑計算去計危險期/安全期係唔可靠嘅。加上精子可以喺女性體內存活5日,如果咁啱遇到排卵,就可能導致懷孕。所以無論發生任何形式嘅性接觸,都要全程使用安全措施,先至可以有效咁避免懷孕:relieved:

至於你話1/16嗰次同男朋友做嘅時候個套甩咗,可能係因為安全套個尺寸唔啱。你可以叫男朋友量度下自己陰莖嘅尺寸,再對比返安全套上面嘅尺寸係咪一樣,睇下有無需要轉一款安全套。 :thinking:

安全套嘅闊度一般都有分M size、L size、XL size等唔同尺寸,一般以mm為單位(例如52mm ± 2mm)。歐美同日本牌子嘅量度方法會有少少唔同,一般會以【 寬度 (Nominal Width)】或者【 直徑 (Diameter)】去顯示:

寬度 (Nominal Width) 【歐美/香港常用】

  • 安全套擠扁時橫向嘅長度
  • 數值上係圓周 (Circumference) 嘅一半
  • 量度陰莖充血時/物件根部嘅圓周,將圓周數值除二就會得到【寬度】嘅數字

直徑 (Diameter) 【日本牌子常用】

  • 安全套放平時圓形的直徑
  • 算術上 直徑 x 3.14 = 圓周
  • 量度陰莖充血時/物件根部嘅圓周,再除以3.14,就會得到【直徑】嘅數字

如果過往買安全套之前,都未試過度陰莖尺寸的話,建議可以先度度陰莖嘅圓周。量度嘅方法就係當陰莖勃起嘅時候,可以用一個卷尺(或類似嘅物件,如繩),圍陰莖一圈,去得出陰莖嘅圓周。然後將 圓周除2,就係安全套所指嘅闊度 。因為安全套係有彈性,所以就可以選擇比實際尺寸細少少嘅安全套款式,比較可以避免安全套滑落嘅情況。 :nerd_face:

至於事後丸嗰方面,想同你講返事後丸嘅原理先:事後丸含有高劑量人造荷爾蒙,透過唔同嘅途徑去緊急避孕,包括:抑制排卵、增加子宮頸黏液分泌令精子難以通過、改變子宮腔環境令受精卵難以著床 。而事後丸有分72/120小時兩種,而愈快服用效果愈好,唔安全嘅性行為之後24小時內服用最好。事後丸係醫生處方藥物,見到你話你食嘅事後丸係喺私家診所度攞到嘅,咁藥效應該都係有保證嘅,唔需要太擔心。

至於你所講流啡嘅副作用,係多數人食完事後丸都會出現嘅。通常食完事後丸之後2~7日就會出血,但亦都有可能照原本時間正常嚟,或者遲遲都唔嚟。食完事後藥後嘅岀血係因為子宮內膜剝落所導致嘅,即使有排卵,都可以令受精卵跟住內膜一齊排出,避免懷孕,依一次嘅岀血算係月經(因為無受精卵著床),所以月經週期都可能會受影響,下一次月經嘅日期都會受影響,例如上一次月經係10月2日,10月15日使用事後避孕藥,10月17日出血,咁下次月經應為11月17日左右。不過因為食完事後藥有機會出現流啡嘅副作用,並唔計為一次月經嘅,所以如果有出血嘅話,記得要留意出血量同日數。而流啡嘅血量係好少嘅,而且流血日數較短。當然,有人食完係冇流啡,亦都冇任何副作用嘅。呢樣嘢同個人體質有關,所以冇出現副作用,唔代表事後丸冇發揮到藥效。

如果你都係好擔心,可以考慮喺性行為後11日(1/27)進行驗孕。因為驗孕棒係透過檢測尿液中嘅hCG (人絨毛膜促性腺激素)含量,呢款激素會係受精卵著床後開始大量分泌,而一般受精著床呢個過程需要6-9日,所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。

最後,都想提醒翻,一次月經週期最多可以食一次事後藥 ,所以呢個月經周期剩低嘅日子,如果進行性行為嘅話都一定要做足安全措施。記住無論任何形式嘅性接觸都要全程佩戴安全套,咁先至可以保障到自己同另一半🫶🏻。

感謝你嘅回覆:pray:t2::pray:t2:呢幾日都有分別流過啡色液體同呢兩三日都有流鮮紅色血液,不過距離事後丸就隔左大概8-9日先有呢啲反應,會唔會都係服用事後丸嘅副作用?:pray:t2:呢兩日連續都有出血情況,但量就唔多。已經買左驗孕棒聽朝即刻去check下:sob::pray:t2:

你呢兩日發現嘅咖啡色分泌物同出血,都係正常有機會出現嘅情況。始終事後丸屬高劑量荷爾蒙藥物,服用之後會令女性血液中嘅激素水平突然提高。到激素回落至一般水平嘅時候,就有機會產生子宮內膜部分脫落,導致流啡色分泌物/陰道出血嘅情況。而服用事後丸之後,亦有機會令你下次黎月經嘅日子有所變動,例如提前/延遲幾日 。不過因為你食完事後丸8-9日之後先至出血,所以都有機會係排卵期出血,唔係事後丸嘅副作用。暫時來講只要佢唔係持續出血,出血量同日數都係比較少嘅話就係正常流啡嘅現象。如果好似平時你月經咁多就要當一次月經咁計,會令到下次月經延遲。

不過因為你進行咗兩次唔安全嘅性行為,所以都要睇埋驗孕結果先可以確定有冇懷孕。因為而家距離你最後一次唔安全嘅性行為過咗11日,所以你而家驗嘅話個結果就已經足夠準確。如果係陰性就可以放心啦!

我今超check左係negative了:relaxed:謝謝你嘅回覆啊:pray:t2:

咁就好啦!之後進行性行為嘅話,記住全程都要使用安全措施,咁就唔使擔驚受怕啦!有咩問題都可以搵返我哋,我哋會盡力幫你解答:smiling_face_with_three_hearts::heart: