有三個問題想問下
（一）現時使用嘅避孕方法係勃起即戴上安全套，拔出後再射，事後灌水確認有冇穿。假如確定使用方法正確，亦冇穿，係咪可以叫做安全避孕，唔會懷孕？
（二）上網睇排卵期大概9日都係懷孕機率比較高，係咪即係代表呢9日都應該避免發生性行為？定係只要安全使用安全套避孕就唔需要太擔心？
（三）最後想提前了解一下事前避孕丸。本人月經比較準，假如食事前，唯一嘅用途就係避孕。知道第一次應該去家計會諮詢同埋買。想問係咪正確咁食就可以唔需要計算排卵期呢啲高危時期？即係除左月經外嘅日期都可以進行安全性行為，而唔會懷孕呢？
唔該晒
Hello~多謝你嘅提問，等我逐個問題覆你啦！
（一）你使用安全套嘅方式都好正確
，我喺呢度補充返兩個post畀你參考一下，係有關安全套嘅正確使用方式同埋令安全套失效嘅原因嘅。希望可以幫到你提高安全套嘅避孕率
令安全套失效的原因： https://www.instagram.com/p/CM4ereiDmIl/?igshid=YmMyMTA2M2Y=
（二）其實排卵期係好難去計算嘅，我哋基本上好難會知道幾時係排卵期。所以原則上係冇「避免喺排卵期進行性行為」嘅說法。而無論係幾時進行性行為，只要全程正確咁使用安全措施，基本上就可以避免懷孕，唔需要特登避開某啲日子。如果你想知道點解安全期唔可靠，可以參考以下呢個post:
（三）首先同你解釋返避孕藥嘅原理先，避孕藥係通過人造荷爾蒙去抑制排卵，改變子宮頸黏液嘅粘稠度，同埋改變子宮內膜環境，從而達致避孕嘅功效。所以，當你食緊事前避孕藥嘅時候，身體係唔會排卵嘅，即係唔會有排卵期（當然，好似我上面咁講，排卵期其實係好難計算到嘅，做足安全措施最重要）如果你係第一次食避孕藥，建議喺開始食藥之前去睇咗醫生先。雖然避孕藥好容易喺市面買到，但係唔同牌子款式嘅避孕藥有唔同嘅人造荷爾蒙成份同劑量。而且唔係每個人都可以服用，例如有心臟／腎臟／免疫功能問題嘅人就未必適合服食避孕藥。所以，建議要等醫生評估下你嘅身體狀況係咪適合同埋適合食邊款避孕藥先開始食。家計會診所／母嬰健康院／部分私家診所都有呢個服務嘅。同埋如果你有睇醫生先食，當你身體出現副作用嘅時候，都可以同醫生商量返，係繼續服用一排，等身體逐漸適應藥物，定係嘗試另一款藥物，搵下最啱自己嘅藥物。而且，通常醫生（尤其家計會醫生）都會建議你喺月經週期（月經第一日去到下次月經嘅前一日為之一個週期）頭7日內（家計會醫生通常建議月經週期第5日）開始食第一粒藥。一嚟可以懷孕風險最低，二嚟對身體嘅副作用同埋對月經週期嘅影響會相對比較細。
初初開始食避孕藥，身體需要啲時間去建立藥效。所以，通常會建議，如果經期頭5日或以內開始食藥，咁食藥嘅頭7日都要配合埋安全套；如果經期第6日或者之後先開始食第一粒藥，咁就建議頭14日都配合埋安全套。只要藥效已經建立左嘅話，咁就算唔配合安全套，喺成個月經周期內嘅任何一日進行性行為，都唔需要擔心懷孕。
而服用避孕藥初期有不規則出血，或者腹痛，其實都係比較常見嘅副作用。一般嚟講1－3個月後身體適應咗藥物，呢啲副作用就會消退。不過情況亦會因人而異，有啲人嘅身體可能需要更加長嘅時間去習慣藥物，不過理論上唔超過6個月。而亦都有啲人係要轉幾次藥，先搵到最適合自己嘅藥。
而喺避孕藥嘅影響下，我哋每個月出血嘅情況唔會好似平時月經咁因為身體週期性荷爾蒙變化、排卵、然後未受精嘅卵子連同子宮內膜喺月經期間排出體外；服藥期間出現嘅「月經」其實係「撤退性出血」，即係服用活性藥物（粉紅色藥丸）期間，有荷爾蒙，而停藥/服用非活性藥丸（白色藥丸），其實冇荷爾蒙成份，而呢個變化就會令到子宮內膜脫落，出現出血現象。所以當身體適應咗藥物之後，避孕藥會令到「月經」好規律嘅。不過服藥初期就會相對唔穩定，你可以睇完醫生再決定要唔要食🫶🏻。