避孕停藥後

大概食避孕藥3年(21日那種),一直都準時食的。

因為於11月頭分手了,所以10月3日係同當時男友進行最後一次性行為嘅日子(無套),而10月份嘅避孕藥都有食完,亦有正常於20號嗰個星期來「月經」,之後已經無再食了。

直到今日(1月尾)發覺已有兩至三個月沒有來月經,所以有點擔心。到現時為止,身體並沒有太大變化,沒有作嘔、噁心、小腹隆起等懷孕徵狀。

其實隔了那麼多個月,是懷孕的機會是否已經很微?現在才去買驗孕棒驗是否已經沒有必要?

完成10月份的避孕藥那次來的「正常月經」後,之後兩三個月都沒來,是否正常情況?(因為上網查資料後說身體需要一段時間才能回復正常)多久沒來才要去看醫生?

希望我描述得清楚,謝謝解答。

補充:分手後,11月及12月心情都一般,而且有一些事情要處理所以都有壓力,也有失眠情況,相信都有少少影響到。

hello你好啊

回應翻10月嗰次嘅性行為先,因為你已經食咗避孕藥3年,亦都係準時食,所以身體已經建立到避孕嘅效果,加上過咗3個月,都無懷孕徵狀,所以應該無懷孕嘅,不過如果你擔心嘅話,可以進行驗孕,結果已經會好準確。

而月經週期方面,喺食藥嘅三年中,身體已經適應咗藥物中嘅人造荷爾蒙,唔會再分泌荷爾蒙或者排卵。你服藥期間嘅「月經」其實係「撤退性出血」/「藥性月經」只係受藥物影響而出現嘅子宮內膜脫落,所以會跟返你嘅食藥週期,每次都好「準時」。但係你而家停咗藥,身體都要慢慢建立返荷爾蒙系統。停止服用避孕藥之後,身體需要一段時間先會恢復自然分泌荷爾蒙同埋排卵嘅狀態,一般避孕藥停藥後1至3個月內就會回復自然嘅排卵及月經週期,月經週期以及經血量會回復番未服用避孕藥之前嘅情況,停藥後初期月經週期亦會比較唔準確 。

亦都有好多唔同因素影響月經週期,例如飲食、休息、壓力,見到你提到11月同12月都比較大壓力,出現失眠嘅情況,依啲情況對月經週期都會有影響。

明白分手對情緒好大影響,可以盡量放鬆,例如同朋友傾計、做運動等,令自己心情好啲。如果下個月仍然未有月經,就需要去睇下醫生做檢查,睇下需唔需要服用催經嘅藥物。記得要同醫生講你之前服藥嘅情況,等醫生可以更加了解你嘅身體狀況,同埋你都可以主動提出希望催經。