好驚有咗:(

之前因為學業原因, 而冇拍過拖, 於是求奇係網上搵咗個SP破處, 因為驚俾人笑廿幾歲仲係處.

1/7做, 佢無戴套, 插完幾下,之後成床血
我上個月24/12嚟m
我下個月月經習慣會延遲幾日
但到今日仲未嚟好驚 唔知係咪有咗
我就感覺尼幾日下腹有d痛

hello你好

首先,你嘅價值唔係由你係咪處女而決定,有無發生過性行為依件事唔能夠反映你係一個點嘅人,破處對你嚟講代表啲咩?可以得到其他人嘅認同?你喺過程中有咩感受?發生性行為係有唔同嘅風險,特別係不安全嘅性行為,風險包括懷孕同感染性病,所以係發生性行為前,需要了解清楚性行為係點嘅一回一事,而唔係單純因為想破處就做出倉促嘅決定。見到對方都係「求奇係網上搵」,可能未必好清楚對方身體狀況同過往嘅性經驗,所以都有感染性病嘅風險,建議喺性行為行為後3個月後,可以去診所或者相關機構做test。

回應翻1/7嗰次嘅性行為先,只要有不安全嘅性接觸,就有懷孕風險。無論有無射精都好,喺無用安全措施嘅情況下已經有懷孕嘅風險,而你無用任何安全措施嘅情況下,進行插入式性行為,係有懷孕嘅風險,都想問下當時有無射精?如果有嘅話,懷孕風險係高嘅,就算無射到,都係有懷孕嘅風險,不過相對地低啲啲,因為陰莖喺射精之前已經會分泌尿道球腺液,內含少量精子。因為依加已經過咗食事後藥嘅有效時間,如果你擔心嘅話,可以考慮驗孕,最後一次性行為7日後驗孕會有初步結果,而11日後驗孕,會有相對準確嘅結果。換言之,今日進行驗孕嘅話,結果都好準確。

另外,想問番出血嘅情況,見到提到依加下腹有啲痛,陰道有無唔舒服?出血嘅情況應該唔會成床血咁多嘅,所以可能過程中整損咗陰道,可以注意番陰道嘅清潔。

如果唔想懷孕,安全措施係好重要,例如安全套、避孕藥、子宮環等,喺使用荷爾蒙避孕法(避孕藥、子宮環等)前,都建議睇醫生先,評估你身體狀況係咪適合。除咗避孕外,安全套亦都可以避免性病嘅傳播係到都想分享點樣正確使用安全套,可以參考我地ig post: https://www.instagram.com/p/B4EX0FVFLUf/ 另外,都可以用潤滑劑,可以增加性愛時嘅舒適感,仲可以大大減低安全套破裂嘅機會,不過只有水性同埋矽性潤滑劑可以同乳膠安全套一齊使用,油性潤滑劑係侵蝕乳膠,令安全套容易破裂。

係到都想分享下,即使無發生過發生性行為,亦唔代表啲咩,有性經驗唔係一個成就,同樣地,無性經驗亦唔係一個缺點。依個係你嘅身體,由你決定發唔發生性行為、性行為嘅對像同幾時發生性行為。如果因為其他人嘅諗法而做出衝動嘅決定,反而有機會傷害到自己,做出違反自己意願嘅決定。希望喺發生性行為前,可以諗下性對你嚟講有咩意義,性慾嘅滿足?親密嘅感覺?獲得其他人嘅認同?諗清楚性對自己嚟講代表啲咩,做好心理準備,清楚知道自己嘅意願,內心都會踏實啲。

無論係咩形式嘅性接觸都好,都需要全程使用安全指施,先最有效咁避免懷孕同感染性病。

好多謝糖不甩詳細嘅回覆. 因為自己覺得係現今社會仍是處女之身, 好羞愧.

7/1 果日有少少流血, 之後果幾日間中流血, 到10/1已經冇乜事. 果幾日有插落去都會有流血.

佢果陣時就冇射到
但我陰道容易濕
而且插之前 佢亦會流出尿道球腺液
所以唔知會唔會增加懷孕風險

不果聽取你嘅意見後, 我會盡快驗孕和驗性病, 以對自己作保障.

hello多謝你嘅回覆
絕對唔需要因為自己係處女而感到羞愧!發生性行為與否,都係個人決定,最重要嘅係遵從自己內心嘅諗法,做出配合自己意願嘅決定,唔需要因為外界嘅睇法而改變自己嘅價值觀!
咁樣出血可能因為過程中整損咗陰道,不過依加都兩星期,亦無再流血,所以應該無咩問題。下次可以用潤滑劑,咁就無咁容易整親。
因為尿道球腺液內含少量精子,所以都有懷孕風險,不過精子數量比精液少,風險相對地低啲。

唔好意思, 我仍然對自己係咪有咗好困擾.

因為尼個禮拜都有作嘔作悶嘅感覺
間中有頭暈同便秘
肚下腹不時扯扯地
所以今朝驗咗孕 但係negative

上個月係24/12嚟M
但依加28號仲未嚟
好擔心自己係咪真係有咗

如果真係有咗
去家計會終止懷孕
係咪好嚴格?

而且我本身有少少貧血
佢係咪會拒絕接受?

我依加仲係學生
冇能力俾兩萬幾蚊去做終止懷孕手術
但又驚俾屋企人知
唔知點算好 好徬徨

Hello~因為今日距離你嗰次唔安全嘅性行為已經過咗11日以上,所以可以好肯定你係冇懷孕嘅,可以放心:relieved:

不過如果你擔心嘅話,我都可以講一講家計會終止懷孕啲程序俾你聽嘅~首先因為你係 26歲以下嘅未婚青少年,咁就要向青少年保健中心查詢或預約,先至可以接受終止懷孕嘅服務。而喺接受終止懷孕嘅服務之前,孕婦係需要到診最少兩次嘅。因為終止懷孕始終都係一個好重要嘅決定,所以都會想就診者諗清楚啲先。家計會嘅姑娘係第一次見面嘅時候會詢問病歷、進行尿液驗孕,同埋提供有關終止懷孕的基本資料及輔導。如果就診者決定終止懷孕,家計會姑娘就會安排就診者再次約見醫生,商議及評估終止懷孕風險,並且進行身體及盆腔檢查,以確定就診者係唔係適合喺家計會進行終止懷孕。詳情可以參考以下網址:終止懷孕 - 香港家庭計劃指導會

而如果係早期懷孕嘅話,可以考慮使用藥物終止懷孕,唔一定要做手術墮胎。至於費用方面亦都冇兩萬蚊咁貴,只係需要大約4000蚊。你可以參考吓呢個網址:終止懷孕 - 香港家庭計劃指導會

雖然你今次冇懷孕,但係都希望你之後進行性行為嘅時候都可以保護好自己,同埋之前要考慮清楚,唔好因為介意人哋嘅目光而做錯決定。有咩困難同埋唔開心都可以搵返我哋,我哋會一直喺度支持你:relaxed:🫶🏻

好嘅, 多謝糖不甩再次詳細耐心嘅回覆.

1個讚