這會影響避孕藥效嗎?

我之前有胃炎,醫生開咗啲胃藥同腸胃抽痛藥但係好似冇抗生素,食左兩幾星期到,期間都有食避孕藥,而食西藥同避孕藥我都有錯開2小時,之後我食完晒西藥隔咗好似兩三日後有性行為同內射,請問咁樣避孕功效會下降嗎?:pray:t3:

Hello~如果醫生開俾你嘅藥物裏面冇抗生素嘅話,咁影響係不大嘅。其實任何藥物都可能影響避孕藥裏面嘅荷爾蒙效力。所以,無論服用事前定事後避孕藥,如果同時服用緊其它藥物,最好配合埋另一種避孕方式。

而點解抗生素嘅影響較大呢?因為服用完抗生素之後,就算隔咗幾個鐘再食避孕藥,都唔能夠保證抗生素嘅藥性唔會影響避孕藥,畢竟藥物喺體內會有半衰期嘅情況,甚至可能影響新陳代謝。除咗感冒藥同抗生素會影響避孕藥效果,一啲精神疾病用藥,例如癲癇、抗憂鬱藥物等,佢嘅影響更大。所以如果有服用開上述藥物,咁喺服用避孕藥之前,一定要事先查詢婦科醫生,並針對個人情況做調整。

不過,睇返你嘅情況,你食嘅西藥只係普通嘅胃藥,唔係抗生素,加上你喺食完晒西藥隔咗兩三日後先進行性行為,所以只要你之後每日準時食避孕藥,唔好漏食,咁就唔需要擔心懷孕嘅:relieved:

好的 謝謝:pray:t3:咁如果我有食用抗生素,咁我系咪應該系食完抗生素後2/3日才好再有性行為呢?

呢一層最好喺開藥嘅時候問埋醫生,因為抗生素都有好多種,同埋唔清楚醫生開俾你嘅份量係幾多,所以好難預計到佢對避孕藥藥效嘅影響。不過一般嚟講,如果想保險啲嘅話,食完藥之後嘅7日都可以配合返外用嘅安全措施,等藥效建立去到一定嘅水平先至唔用安全套。

好的,謝謝:pray:t3:
另外都想問下我晚上10食左避孕藥 之後大約晚上11.20/30分 肚痾左1次 痾水,想問要唔要補食避孕藥呢? 同埋如果冇補食到系咪就冇左藥效呢?:saluting_face:

如果喺食完避孕藥之後嗰12個鐘內出現屙嘔嘅情況,係需要補食返1粒嘅,如果唔係會令藥效降低。請盡快補食!要留意到聽日食藥嘅時候,係跟返平時你食藥嘅時間食(即係夜晚10點),唔係你補食個時間。而如果你係用同一排補食嘅話,要留意唔好食少咗一粒。建議你可以開一排新嘅,作為補食嘅用途/買唔到藥嘅時候食,咁就可以避免出現係一個月經周期內食多咗或者食少咗嘅情況啦!

Oh 咁我冇補食到的話,系咪就要開過一排重新食架?定系可以照食反完先果排呢?

如果冇補食到,都係繼續食埋宜家食緊呢排嘅,唔洗開過一排新嘅。不過漏食之後嘅1-2個禮拜如果進行性行為,最好配合返外用嘅安全措施,以確保避孕成效。

1個讚