上個月大概1.12到同男朋友發生咗性關係
雖然冇插到入去但係佢冇戴套，我亦冇着底褲磨擦咗佢一陣，大概3-5分鐘到，佢冇射
我唔太記得有冇接觸到龜頭，好似係又好似冇
然後我上個月都冇嚟m，我呢幾排大概係隔咗29-30幾日嚟嘅m，但係今次隔咗44日都未嚟，以前都有試過40日-年幾都冇嚟，不過係上年又正常返
依家好驚係咪有咗，因為除咗未嚟m，體重都有上升，不過我唔知關唔關事，因為最近食多咗零食… 原本53依家去到54-56左右
分泌物嘅話我唔太清楚算唔算多因為我成日唔記得換護墊所以通常都着成日，但係唔會話成張護墊濕曬
乳房方面我唔知係自己心理作用定點，感覺好似大咗，但係望耐咗又好似冇 平時乳房都會有少少酸酸痛痛，之前已經係咁
呢幾排一直好焦慮，真係好驚有咗 未做好心理準備，嗰日之後都有做好安全措施第一日因為太興奮冇注意到…
摩擦過程應該得1-2分鐘分鐘左右 因為我記得磨擦咗幾下我就離開咗佢身體
Hello~多謝你嘅提問
首先，精子暴露喺空氣中通常幾分鐘內就會死亡，而且精子需要有精液嘅保護先可以生存，所以當接觸到皮膚表面嘅時候，精液會被吸收同揮發，進一步減低精子嘅存活率，所以就算尿道球腺液（陰莖係性興奮嘅時候會分泌嘅液體）含有少量精子，純粹掂到外陰+冇插入而導致懷孕嘅可能性係好低嘅，唔使太擔心。
至於月經延遲嘅原因有好多，體重過輕，壓力大，生活唔規律…都會導致月經遲嚟。除非月經比起平時遲咗三個星期以上都未嚟，先至需要睇醫生，等醫生考慮會唔會處方荷爾蒙藥物畀你去催經。現階段可以再等下先，如果真係好擔心，可以喺月經遲嚟7日嘅時候驗孕，嗰陣時嘅結果就最準確～🫶🏻
不過見到你之前嘅經期好似都唔係好準，如果可以嘅話抽時間去做個詳細嘅婦科檢查會好啲，因為有機會係子宮相關疾病嘅徵兆。唔怕一萬只怕萬一。你都可以趁機問吓醫生嘅意見，睇吓需唔需要服用低荷爾蒙劑量嘅避孕藥嚟調經。
至於體重上升係經前症狀之一，因為嚟月經之前女性容易水腫，所以有機會係代表就嚟月經。乳房酸痛都係其中一個經前症狀，所以你應該好快就會嚟月經，唔需要太擔心有咗～
另外都想提一提你，千祈唔好一塊護墊着成日！因為喺潮濕、炎熱嘅環境底下，細菌係好容易滋生嘅，特別係念珠菌。係一般情況下念珠菌只係普通真菌，對人體無害，但係一旦佢大量繁殖，就會造成感染，出現發炎、紅腫、痕癢灼痛嘅感覺
。咁到時就要睇醫生用抗生素/塞藥治療。所以千祈唔可以懶，最多三個鐘頭就好換一次護墊啦！
好的我睇吓呢幾日有冇嚟m先!!!
多謝你嘅提醒
1個讚