我自己一直好擔心會搞大家女朋友個肚，所以一直都冇同佢有插入式嘅性行為，平時最多係用口同埋手。因為遲啲會同佢去旅行，所以想搞清楚一啲問題…
但係我想問吓，女朋友用口幫我含（我冇喺佢口入邊射精，最多剩係得pre-ejaculate），然之後我哋接吻嘅話，如果我緊接之後再用我個口去舔佢下面，係咪都有機會令佢懷孕？如果會嘅話，我隔一日之後先再舔佢下面會唔會就冇風險呢？（因為個口又潮濕又暖，我驚啲精子喺入邊會存活好耐）
另外我想問如果我哋喺同一個裝滿水嘅浴缸入邊互相用手幫對方自慰嘅話，啲精子會唔會經過水去到佢嘅陰道呢？？
最後，如果我用安全套進行插入式性行為，其實係咪應該喺前戲嗰陣就要帶好安全套呢？
我知道我有好多問題啊，多謝你哋花時間睇！！
Hello~多謝你嘅提問
等我逐題回覆你啦～
首先，精子暴露喺空氣中通常幾分鐘內就會死亡，而且精子需要有精液嘅保護先可以生存，所以當接觸到皮膚、紙巾等表面嘅時候，精液會被吸收同揮發，進一步減低精子嘅存活率。加上尿道球腺分泌只含有少量精子，而人體口腔有消化酶，不利於精子存活，所以經過你女朋友嗰口，通過接吻，再用你個口去舔佢下面，而導致懷孕係可能性係不大嘅。不過，如果你嘅精子活躍程度好高，而對方又係容易受孕嘅體質，咁就算冇插入，都有可能懷孕。不過大前提係你哋嘅性器官有直接接觸，所以根據你同我哋講嘅呢個情況，懷孕嘅可能性係好低嘅。
至於一齊浸浴缸自慰，因為精子射入水裏面好快就會死，而再犀利嘅精子，1分鐘都淨係游到2-3cm嘅距離，何況要進入你女朋友嘅陰道仲需要經過重重難關，例如不利於存活嘅酸性環境。所以精子係好難經過水去到佢嘅陰道嘅。
最後，我哋會建議無論發生任何形式嘅性行為，都要全程使用安全套，因為我哋呢度講嘅安全，唔單只係避免懷孕，仲包括避免性病嘅傳播。所以只有全程使用安全套先至可以有效咁保障到自己同埋另一半🫶🏻。