都唔知佢想點

我係個女仔嚟,其實我已經表明係好鍾意佢,同佢一齊已經幾個月,但佢成日話同我溝通有問題,係我角度我真係唔覺同佢溝通有問題,我覺得佢對我有時好熱情又會話掛住我,但有時可以一兩日唔搵我,對我又好冷淡,咁其實佢係咪真係鍾意我呢?

佢態度嚟睇,忽冷忽熱可能係PUA緊你;或者你態度強勢D直接問佢,又或者假扮有其他男仔對你好,做戲俾佢睇咩反映咯

真係好憎PUA既人,但當我遠離佢或者放棄呢段關係,佢又會講D嘢令我理返佢。。。。。我真係好傻好蠢 :smiling_face_with_tear:

Hello~好開心你願意將你嘅煩惱同我哋分享:heart:聽你嘅說法,你嘅伴侶對你嘅態度忽冷忽熱,令你有啲不知所措,甚至開始懷疑對方嘅真心:pleading_face:

首先,我想問下當對方冷落你嘅時候,你有冇主動聯絡佢?或者知唔知佢當時喺邊度做緊咩?對方突然1-2日都冇聯絡你應該係有佢嘅原因,如果未了解就話對方PUA,未免對佢有啲唔公平。何況根據你講嘅內容,對方好似冇用情緒勒索你做唔鐘意/唔願意嘅事:thinking:。當然,對方有冇喺冷落你嘅時候approach其他人,呢個係未知之數。喺呢個階段,搜集多啲資訊,或者主動同佢傾都可以幫到你客觀咁分析你哋呢段感情,做出最佳嘅選擇。

其次,我知道你哋一齊咗冇幾耐,可能都未係好了解對方嘅性格/處事方式,信任度不足,所以先會有咁大嘅不安感:cry:。如果你做戲試探佢,或者態度強硬咁問佢,對方可能會覺得奇怪。如果對方同樣覺得安全感唔夠,可能會因為覺得你呃佢/唔信任佢,爆發更大嘅衝突。所以你問佢嘅時候應該要show到畀佢睇,你係關心佢同埋緊張佢,唔係想質疑佢。你亦都要明確咁畀佢知你對佢呢種忽冷忽熱嘅態度覺得好冇安全感,亦都好難適應呢種相處模式。而你今次同佢傾係希望議事論事,想有一個共識去相處,唔係針對個人。

你亦都可以諗返轉頭,當初點解會同佢一齊,鐘意佢啲咩,而宜家有咩改變,點解會想有想遠離佢或者放棄呢段關係嘅諗法等等。要明白每個人喺一段關係入面願意付出嘅嘢同期望得到嘅嘢係唔同嘅,呢度唔單止係指物質上嘅付出同期望,仲包括精神上嘅價值,例如陪伴、身體接觸等。可能對方覺得宜家陪伴你嘅時間已經足夠,或者覺得需要有個人嘅時間同空間,所以先唔聯絡你。但對方覺得足夠,你唔一定會有同樣嘅感覺,所以要通過溝通協調,攞個平衡。你都可以趁呢個時機,定立一啲個人嘅界線同底線,如果有一個價值觀你係好重視嘅,唔能夠退讓嘅,咁無論對方講咩,你都唔應該屈就。你絕對唔係傻或者蠢,因為戀愛係一個挑戰嚟,會令人有各種各樣複雜,甚至矛盾嘅情緒,所以你會因為對方嘅說話而返返去佢身邊都係正常嘅,唔係唔理性,亦唔係感情用事,只係喺嗰個當下,你仲鍾意佢,唔想放棄呢段感情啫:face_holding_back_tears:

希望以上嘅內容幫到你~如果有其他資訊,亦都歡迎你補充,或者同我哋分享,呻下:see_no_evil:。我哋會一直喺度支持你:two_hearts:

其實我哋個關係都有啲複雜,但佢真係令我唔知應該點對佢好,當我唔理佢佢又會對我好返啲,但當我對佢好好,佢又冷冷淡淡咁,所以好多時都好想放棄,但當我唔理佢,佢又會講啲嘢令我唔捨得放手離開,可能因為我鍾意佢多過佢鍾意我嘅關係:smiling_face_with_tear:

睇嚟你係覺得自己嘅付出同對方嘅付出唔同步,亦都唔對等:thinking:,咁樣的確係會令人好沮喪嘅。聽到你話覺得自己鍾意佢多過佢鍾意你,點解你會咁覺得嘅?咩時候會有呢種感覺呢?如果你一直以來都有呢種感覺嘅話,咁可能係時候要同對方傾下,睇吓點樣解決:cry:

每個人都有好多表達愛意嘅方式,有啲人prefer俾對方鼓勵、承諾(words of affirmation),有啲人prefer同伴侶享受有質素嘅共處時光(Quality time)、有啲人prefer用禮物表達愛意(receiving gifts)/幫你做嘢(acts of service),甚至乎有啲人會以性/身體接觸(physical touch)傳遞愛意,感受同對方緊密嘅連結。呢度有一個假設,會唔會係對方向你表達愛意嘅表現你冇咁prefer,所以誤以為對方冷落你?可能佢都唔知你prefer咩表達愛嘅方式,所以產生咗矛盾而不自知。咁嘅話就一定要同對方傾下,將你prefer嘅方式明確咁話俾佢聽,解開誤會:face_holding_back_tears:

明白你仲好鐘意佢,所以冇辦法完全放棄,但如果呢段關係令你好煩惱,甚至好辛苦:cry:,咁不妨畀自己休息下,大家分開冷靜下,諗清楚自己想要啲咩,再討論🫶🏻。

今日正式分手了:broken_heart:謝謝回覆:cry:

呢個結果一定令你好難受啦:pleading_face:,如果你想搵人傾嘅話,隨時搵返我哋,我哋會一直喺度關心你,支持你:face_holding_back_tears:

多謝,真係好難受,但可能呢個結局係最好,錯愛始終都係錯愛,再挽留都係無意思,只會令佢再傷害多我幾次,放過佢等如放過自己,呢個道理我好明白:sob::sob::sob:

都明白你嘅諗法嘅,勉強冇幸福:cry:。就算幾鍾意都好,有啲嘢係唔夾就係唔夾。唔係話唔應該愛嘅,不過有少少遺憾同可惜咁。好欣賞你願意接受呢個結果去放過自己,呢個係愛自己嘅表現,亦都令你成長。雖然可能要花唔少時間去調整自己,但係我哋可以保證你喺呢條道路上邊唔會剩係得自己一個,我哋會一直係你身邊🫶🏻:heart:

希望佢唔好再了返我就最好,因我一定會願意再同返佢一齊,有時決絕啲可能仲好,起碼我唔會再對佢有期望:see_no_evil:

無論之後呢段感情發展成點都好,最緊要係你清楚自己想要啲咩,同埋識得保護自己,唔好咁容易被人傷害。感情呢樣嘢冇話咩係啱咩係錯,好多時都係聽從自己內心嘅。不過要記住愛人哋嘅同時都要愛自己,唔好忽略自己嘅感受同需要呀🫶🏻!

1個讚

明白,多謝你哋開解及支持:heart:

1個讚

我哋又走返埋一齊:see_no_evil::see_no_evil::see_no_evil:
其實我有諗過佢係咪因為性而搵返我,因每次佢都有呢個需要:pensive:
又好奇怪,每次我見到佢,我自己都係忍唔住,可能我真係太鍾意佢了,咁點先知佢係咪真係鍾意我呢?佢成日話佢唔鍾意嗰個女仔就唔會做,但有邊個男人真係咁吖,好老實我唔會信囉:see_no_evil:

真係有男人係咁㗎 :joy_cat:
唔好話唔鍾意嗰個女仔
就算鍾意嗰個女仔,佢都可以唔做
但佢好就得人,我想要嗰陣 講聲就得 :see_no_evil:
我男朋友喺sex方面係屬於可有可無嗰種

佢真係講到如果佢唔鍾意,除晒企係佢面前都唔會,第二個我都可能會信,但佢就……真係唔多信佢,我係咪唔應該咁呢:see_no_evil:

唔信佢但係又走返埋一齊?
咁樣會長久咩?唔驚佢再傷害多你幾次?
既然走返埋一齊,或者當佢話要上床嘅時候 你試下say no囉,睇下拒絕咗佢 冇sex嘅話,佢會有咩反應
係發脾氣/體諒你/軟磨硬泡/不停講自己有需要 定係點
再睇返你諗嘅嘢啱唔啱,佢係咪因為性而搵返你

你真係要好好同佢溝通下喇
點都好啦
祝你幸福啦 :smiling_face:

Hello~你哋一齊返呢樣嘢真係幾令人意外,我諗你都冇諗過自己真係會估中,對方真係因為性而搵返你:see_no_evil:。不過都想問吓你,你點睇你哋而家呢段關係?雖然見到你話你自己太鍾意佢,但係你就唔係好相信佢講嘅嘢,咁其實你嘅內心係點諗嘅呢?唔係話你咁樣唔好,只係想你對自己坦白,你鍾意嘅嗰個佢,係咪真係宜家呢個因為性需要而同你復合嘅人:thinking:

而你又點睇愛情同性嘅關係呢?如果你哋呢段關係單單靠性嚟維持,咁又係咪理想呢?你一開頭搵我哋係因為對方對你忽冷忽熱,令你好難受好不安,好唔sure對方係咪真係鍾意你。咁就算分開咗一排,呢個問題到宜家都係冇解決到㗎喎。如果佢隔咗一排又試係咁嘅話,你又頂唔頂到呢?:face_holding_back_tears:

正正因為見到你投入同付出咗好多野喺呢段感情入面,所以無論係我哋定係其他回覆你嘅人都唔希望見到你受傷或者唔開心,希望你愛惜同埋重視自己多啲🫶🏻。

我自己都唔知,其實大家都係成年人,所以我覺得有性係無問題,我只知對佢有好大感覺,成日都好掛住佢,但就唔知佢個心點諗,同佢一齊又真係對佢有性衝動,以前係未試過對異性有性衝動,所以又真係好難抗拒,正正因為佢,我開始嘗試有食避孕藥,其實我覺得對佢付出好多,但佢對我就成日忽冷忽熱:pensive:

都明白呢個人對於你來講應該係一個特別嘅存在,所以佢一搵返你,你就應承,同埋你都會對佢有性衝動。但係正如你所講,你為佢付出咗咁多,但係對方就好似唔重視呢樣嘢。咁你就要諗清楚呢個人值唔值得你為佢付出咁多。而佢又能唔能夠回應到你對佢咁強烈嘅感覺同埋思念。

至於你話係為咗佢先至開始嘗試食避孕藥嘅,唔知你願唔願意講多少少?因為無論使用邊種安全措施,之前都係要得到雙方嘅共識嘅。我哋會希望食避孕藥嘅呢個決定係你自己嘅個人意願,而唔係為咗某個人:pensive:

既然佢對你忽冷忽熱嘅呢個問題已經困擾左你咁耐,我哋都會建議你坦白咁同佢講傾吓。話俾佢知你嘅憂慮同埋討論下,究竟雙方對於呢段關係有咩期望,同埋係點樣睇對方嘅身份嘅。如果佢係覺得你係可有可無嘅,有需要嘅時候先至搵你嘅話,咁你就要諗吓自己係咪想要一段咁樣嘅關係,或者係咪繼續為佢付出啦。

1個讚