岩岩係一個按摩店接受推油按摩，按摩師冇帶手套，但其間沒有任何性接觸 (包括沒有手淫），冇掂過佢性器官，佢亦都冇掂過我下面，但後來先知按摩店好似有提供性服務。
推油其間我有著自己底褲，再著佢提供既紙底褲，請問有機會感染性病及我需要就這次按摩做性病檢查嗎？thanks
Hello 根據你所講嘅情況，會感染性病嘅風險其實好低。
首先，性病主要嘅傳播途徑透過體液，例如精液、腸液、尿道球腺分泌（Pre-cum）、陰道分泌、血液，接觸過身體比較薄嘅黏膜組織，例如肛門、口腔、陰道，或者傷口先傳播到病毒。你提到你係按摩期間都冇進行任何性接觸，雙方都冇接觸過性器官，只係單純按摩，其實傳染到性病嘅風險係極低。再加上，其實對方亦未必會有性病，我地都唔應該假定咗對方係有提供性服務所以就一定有性病，如果對方冇性病的話就不可能傳染到性病。所以其實都唔需要太擔心自己感染到性病。
當然，如果你始終唔放心，都可以做性病測試。唔同嘅非政府機構，例如關懷愛滋、香港善導會水銀星三號、香港愛滋病基金會、再思社區健康組織等等都有提供性病測試，或者你都可以去私家醫療服務中心或者衞生署社會衞生科診所進行測試。不過其實性病係有空窗期，就算真係感染到有性病，而家即刻去驗都係冇咁快驗到嘅，起碼都要等三個星期之後先至會驗到。
另外提醒返，如果之後想再接受相關按摩服務但又有所擔心嘅話，就最好搵返啲比較可信嘅機構，或者受政府監管、有牌照嘅按摩店會比較好。
希望解答到你嘅疑問。
1個讚
thanks 唔該哂 咁我放心好多
1個讚