從上年8月開始食優悅避孕，食完直到而家經期都好準時，通常喺食第3粒白色藥丸就會黎m
今個月食到呢排優悅最尾個幾粒我先懷疑自己中間漏食左一日避孕藥，而家到食完左成排都未黎m
係咪因為中間漏食左所以呢排既優悅避孕藥已經無效? 我而家應該要點做? 當無事照繼續開排新既食? 還是唔好食住，等今次黎左m 後當重新開始食避孕藥咁食法?
謝謝
Hello~多謝你嘅提問
想問吓你知唔知自己係邊一日漏咗食？因為通常避孕藥都係有日期/次序指示嘅，好少會食晒成排都唔知自己漏咗。而避孕藥補食以兩日為限。如果一日唔記得食，咁第二日食藥嘅時候可以食兩粒。如果兩日都唔記得食，咁之後嗰兩日食藥嘅時候都要食兩顆。如果唔記得吃藥嘅日數超過兩日以上，咁藥效已經受到影響，需要大約兩個星期嘅時間重新建立。
睇返你嘅情況，因為食緊避孕藥時出現嘅撤退性出血係源於荷爾蒙水平嘅下降，你今個月冇出血/未出血，可能係因為漏食打亂咗個規律。如果你呢一個月有發生唔安全嘅性行為，咁就有機會懷孕。你可以喺性行為嘅7日或11日後進行驗孕，驗孕棒最早可以喺性行為嘅7日後驗出初步結果，而喺性行為嘅11日或以後驗出黎嘅結果係非常準確嘅。
如果你唔清楚幾時漏食，咁你可以當無事照繼續開排新既食，但食藥嘅頭兩個星期就需要配合外用嘅安全措施，等藥效重新建立。你亦都可以set個鬧鐘，或者用app，提醒自己每日按時食藥，同時記錄低出血同埋食藥嘅情況。咁就可以減少漏食嘅情況啦🫶🏻～
謝謝你既解答
我本身每日都記得大約夜晚10點半食藥，但其中有一日忙到頭昏腦脹，到11點突然醒起要食藥，但拎左排藥出黎見個日粒藥無左，當下以為自己已經食左就無理到，到隔左幾日忙完，我再回想，我諗極都唔覺得個日有食到，無食既可能性勁大，但又唔知點解唔見左，一係我早一日食多左，一係佢跌鬼左。
anyway, 如果照你咁講，我漏食左既話，咁呢排藥效已經減弱，或者無效，咁我繼續而家開排新既食仲會繼續到個規規律嗎？咁如果變左係之後食左幾粒紅色藥先黎仲會跟到個週期?
如果我而家唔食，當係停左食避孕藥，到黎既時候第一日重新再食，成為新既規律同週期既話，又會唔會有影響？
點解會建議繼續食rather than 停食等黎m 先再食呢個做法既?
謝謝你
如果咁嘅話，真係無從得知嗰粒藥究竟有冇食到
而漏食一日嘅話，藥效雖然會降低，但係唔會完全冇晒。因為避孕藥係通過人造荷爾蒙去抑制排卵，改變子宮頸黏液嘅粘稠度，同埋改變子宮內膜環境，從而達致避孕嘅功效。避孕藥係高劑量嘅荷爾蒙藥物，通過提高身體嘅荷爾蒙水平抑制排卵。之所以每日都要服用，係因為要維持身體嘅荷爾蒙水平係一個比較高嘅位置。如果你真係漏食咗一日嘅話，可能會因為荷爾蒙水平下降，而令身體成功排卵，如果咁啱遇到精子嘅話，就有機會懷孕。不過因為你後續都有繼續每日食藥，所以懷孕機率係不大嘅。之所以會建議你繼續食，係因為你漏食之後都有keep住食埋呢一排，所以並唔係完全冇晒藥效。建議你頭兩個禮拜都要配合外用嘅安全措施，係因為唔知道你係邊一日漏食，唔肯定身體有冇排卵，所以兩個禮拜最保險。如果你停藥嘅話，可能需要等一個月，等嚟月經嘅時候先至重新服用。因為好似我上面所講，食緊避孕藥嘅時候出現嘅係「撤退性出血」，並唔係月經。如果想從頭開始食避孕藥嘅話，係需要喺月經嘅頭1-5日服用，咁你就需要等今次撤退性出血完咗之後（因為唔肯定有冇排卵），再等多一個月，等有正常月經出現嘅時候再食藥。咁變相係嘥咗時間，加上停藥之後有機會出現副作用，令到月經周期變得混亂，所以keep住食反而可以更加好咁維持而家嘅週期規律。