調經用避孕藥代數

調經嚟講第四代低劑量雌激素會唔會差過第二代嗰啲 醫生淨係講食避孕藥調經但冇講邊隻又冇開藥

Hello你好啊

想問清楚,你指嘅差係藥效方面定係副作用?

其實而家市面上主要使用嘅荷爾蒙藥都係第三代或者第四代嘅,而每新一代荷爾蒙藥嘅副作用都會少過之前嘅。

有啲人有嚴重經痛,經期比較亂,或者血量太多,都可以透過服用荷爾蒙藥,利用人造荷爾蒙,調整體內荷爾蒙水平。

每個人嘅身體都唔同,吸收荷爾蒙嘅速度同對藥物嘅反應都唔一樣,所以其實同第幾代嘅藥物冇咩關係。例如有啲人係食緊荷爾蒙藥,未到停藥期間就岀血,代表佢身體吸收荷爾蒙嘅速度較快,荷爾蒙藥嘅劑量未必足夠,需要其他劑量較高嘅藥。

有啲人係頭幾個月食荷爾蒙藥嘅時候,可能會有多少少嘅副作用,例如嘔吐,不過呢啲副作用都會係幾個月後消失。見到你都有睇醫生,如果醫生冇開藥俾你嘅話,都可以問吓佢,基於你本身嘅身體情況,有冇啲荷爾蒙藥藥嘅推介,或者叫佢開俾你。都可以keep住俾醫生跟進下你食藥嘅情況,如果真係副作用太大,相信醫生都會因為咁而有啲調整,當然啦我哋都鼓勵你可以問清楚醫生開邊一隻藥俾你,清楚自己食緊咩藥係好重要嘅。

1個讚

姐係調經嘅效果同第幾代藥冇乜太大關係?

係啊,最主要都係睇翻你身體對藥物嘅反應

1個讚