我食咗yaz 差唔多半年，之前每個月經期都好準時，最多遲1-2日。但係今個月應該8號黎，去到今日已經開左新一包yaz 食咗2粒都仲未黎。呢幾日淨係有少少啡色血跡。
咁係咪唔正常？
Hello~多謝你嘅提問
因為避孕藥係高劑量嘅荷爾蒙藥物，係通過人造荷爾蒙去抑制排卵，改變子宮頸黏液嘅粘稠度，同埋改變子宮內膜環境，從而達致避孕嘅功效。只要你每日都準時服用，冇漏食嘅話，係唔需要擔心懷孕嘅。食緊避孕藥嘅時候出現嘅係「撤退性出血」，並唔係月經。通常撤退性出血嘅血量都會比月經少，有啲女仔食緊避孕藥嘅時候甚至會冇出血，所以暫時嚟講你嘅情況係正常嘅。除非仲有出現其他副作用，如果唔係可以再觀察吓先。如果真係擔心可以預約醫生複診，睇吓需唔需要換過隻藥，或者調整荷爾蒙嘅劑量。
因為上個月嘅避孕藥好似唔小心食多咗一粒，會唔會因為咁所以搞亂咗個經期？如果今個月冇月經係咪都正常？
如果只係食多咗一粒係唔會搞亂經期嘅。我解釋多少少啦～荷爾蒙避孕藥係用人造嘅荷爾蒙係取代本身嘅月經週期，原則上食咗藥係會抑制咗排卵嘅，即係喺你開始咗食避孕藥嘅時候，子宮內膜就唔會再增厚，亦唔會有月經。因為本身每個月出現嘅月經係因為卵子冇受精而排出嘅，食咗避孕藥之後就唔會有呢個情況。
而由於藥物嘅設計想比使用者習慣每個月都有月經，感覺上有一個規律性同埋知道自己冇懷孕嘅感覺。所以食到最後嗰幾日冇藥效嘅藥物/停藥期，因為荷爾蒙嘅驟降，都會有少量子宮內膜出血嘅情況，形成咗我哋服藥之後見到嘅嗰啲出血嘅情況。雖然外界一般都會繼續叫佢做月經，但佢正式嘅學名其實係撤退性出血（withdrawal bleeding)。所以有時候喺服用事前避孕藥期間，特別係頭幾個月，見到啡色嘅出血，會好難判斷到佢係副作用嘅出血啊，定係撤退性出血。
所以食多咗一粒只係令荷爾蒙有多咗一日嘅時間維持喺高嘅水平。正常嚟講，只要被身體吸收，荷爾蒙水平說會下降，導致撤退性出血。而你宜家流啡嘅情況係唔能夠當嚟咗「月經」嘅，即係話你呢個月都係會有「月經」嘅，可能需要再等下。
但係我而家已經開始左食新一包藥，咁荷爾蒙又升返，咁係咪今個月唔會黎m？
因為你已經開咗新一排，所以有機會要等到你食完呢一排之後先至嚟。只要你嘅身體冇太大嘅唔舒服，都係唔需要擔心嘅。
另外想問下，因為我已經食咗差唔多有2年，如果有時食漏咗一粒，所以係咪都唔會有事？
漏食一日嘅話，藥效雖然會降低，但係唔會完全冇晒。因為避孕藥係通過人造荷爾蒙去抑制排卵，改變子宮頸黏液嘅粘稠度，同埋改變子宮內膜環境，從而達致避孕嘅功效。即係話就算喺漏食嘅時候，精子遇到卵子變成受精卵，避孕藥都能夠通過阻止佢着床，避免懷孕。而因為避孕藥係高劑量嘅荷爾蒙藥物，通過提高身體嘅荷爾蒙水平抑制排卵。之所以每日都要服用，係因為要維持身體嘅荷爾蒙水平係一個比較高嘅位置。如果你真係漏食咗一日嘅話，可能會因為荷爾蒙水平下降，而令身體成功排卵，如果咁啱遇到精子嘅話，就有機會懷孕。不過因為你後續都有繼續每日食藥，所以懷孕機率係不大嘅。你可以每日定一個鬧鐘提醒自己食藥，同埋用app記錄食藥嘅狀況，咁就可以避免漏食啦！