食左幾個月事前藥
但係呢個月黎M之後就每日都有小量血咁 真係可能一兩滴 護墊都可以接曬 食左第三日白色開始黎M 開新藥食左7日都係KEEP住有血 但係之前幾個月都冇事 想問可以點解決
Hello~首先，荷爾蒙避孕藥係用人造嘅荷爾蒙係取代本身嘅月經週期，原則上食咗藥係會抑制咗排卵嘅，即係喺你開始咗食避孕藥嘅時候，子宮內膜就唔會再增厚，亦唔會有月經。因為本身每個月出現嘅月經係因為卵子冇受精而排出嘅，食咗避孕藥之後就唔會有呢個情況。所以呢度想解釋返畀你聽你而家嘅「月經」係咩嚟嘅先～
由於藥物嘅設計想比使用者習慣每個月都有月經，感覺上有一個規律性同埋知道自己冇懷孕嘅感覺。所以食到最後嗰幾日冇藥效嘅藥物/停藥期，因為荷爾蒙嘅驟降，都會有少量子宮內膜出血嘅情況，形成咗我哋服藥之後見到嘅嗰啲出血嘅情況。雖然外界一般都會繼續叫佢做月經，但佢正式嘅學名其實係撤退性出血（withdrawal bleeding)。所以有時候喺服用事前避孕藥期間，特別係頭幾個月，見到啡色嘅出血，會好難判斷到佢係副作用嘅出血啊，定係撤退性出血。
你呢個情況可能係因為食緊嘅呢隻藥劑量太低，因為如果劑量唔夠，咁就維持唔到身體嘅荷爾蒙喺食緊藥嘅時候喺一個高嘅水平。因為荷爾蒙藥喺會被人體消化同吸收嘅，唔會喺身體累積，所以當劑量唔夠，有機會喺你食下一粒藥之前，身體內嘅荷爾蒙就已經開始下降，令子宮內膜出血。只要提高返避孕藥嘅劑量，就唔會再出血，可以放心
。
如果你係喺家計會配藥嘅話，可以預約返姑娘覆診，睇吓需唔需要轉過另一隻藥。不過就算轉藥你都要食埋而家呢排先，確保藥效持續。