之前用開condom，但我哋都覺得有啲貴，所以轉咗食藥
而家食咗差唔多兩個月，不過都有keep住用condom
身體冇乜不適，咁應該係代表適應咗？
同埋應該可以開始唔用condom？（我哋都去咗做身體檢查，make sure冇性病先至打算唔再用condom）
咁就有問題出現喇
以前用condom，精液唔會周圍都係
但如果唔用嘅話，佢就有機會射咗去唔同地方，例如張床/我身上
又或者直接keep住抽插直至射精，不過之後都係有機會會流咗少少出嚟，淨污糟個地方
所以想問下，應該喺一個乜嘢嘅環境進行性行為/點樣佈置，從而保持乾淨
同埋如果身上有精液，係咪一定要用凍水沖 
用熱水會黐住？男朋友係咁樣同我講，佢話係經驗之談
咁冬天點算 
同埋就算夏天應該都唔好？因為其實我哋都用幾多體力，出汗都多
喺體溫高嘅情況用水凍沖咪會好易病囉，阿媽由細到大都係咁講 
另外就係關於陰道，雖然性行為之後我哋都會去沖涼，但我知道陰道唔可以直接攞水沖洗，咁沖完涼之後應該都仲係會有少量精液？我應該點樣做？用護墊？除咗呢樣仲有冇其他方法
問題有啲多 
唔該晒 
Hello~多謝你嘅提問
首先回應返第一個問題，事前避孕藥最好喺月經頭五日開始食，咁就只需要喺頭7日配合外用避孕措施。但係如果喺之後就開始食，咁就頭兩個禮拜都要配合外用嘅避孕措施。所以你已經食咗兩個月嘅話，已經可以唔需要同時使用安全套。因為剩係得使用安全套先能夠有效咁預防性病嘅傳播，避孕藥係唔能夠做到預訪效果嘅，所以都好欣賞你哋願意做咗性病檢測先至唔用安全套。呢個係尊重同埋愛護對方嘅表現
。
另外，如果怕唔用安全套會整污糟地方嘅話，可以考慮進行性行為嘅時候喺床上面鋪防水嘅物料或者毛氈。即係做完之後可以扔或者拎去洗嘅。如果怕整污糟床舖嘅話，都可以考慮喺浴室進行性行為。做完之後可以直接用水沖走。因為精液含有蛋白質，所以如果用滾燙嘅熱水沖嘅話，可能會令到佢凝固變硬，更加難沖走，用凍水會好啲。而喺用水沖走之前，你亦都可以用紙巾或者不含酒精嘅濕紙巾抹走皮膚表面嘅精液先因為紙巾等材質會吸收精液，除咗可以快速降低精子嘅存活率之外，亦都可以令黐笠笠嘅精液更容易被水沖走。咁就唔使用凍水沖涼啦！
最後，因為陰道有自我清潔功能，所以做完性行為之後，係唔需要用水灌洗嘅，亦都唔需要用手撩返出嚟。因為咁做反而會破壞陰道嘅酸性平衡，唔小心大力咗仲可能整損陰道。你可以飲多啲水，等殘留喺陰道嘅精液混合分泌物，可以喺屙尿嘅時候一次順勢屙出嚟。一般嚟講做完之後即刻去廁所嘅話，已經能夠將一部份嘅精液排出體外。用護墊當然都係一種方法，可以用來吸收流返出嚟嘅精液同埋分泌物，不過要留意如果分泌物較多嘅話，就需要頻密啲更換啦～
希望以上嘅資訊幫到你