如果當日為咗降低陰莖嘅敏感度，而喺起身之後自慰一次，咁夜晚性行為嘅時候會唔會令勃起硬度下降 令對方「冇咁好feel」？
其實係咪有啲矛盾 
Hello，多謝你既提問。首先，都想問下點解要降低陰莖敏感度？如果你願意可以講解下原因，等我地了解一下，可能會解釋得清楚一啲你知。
如果你係早上自慰射精其實對晚上性行為既表現唔會有太大影響。
雖然男性在射精之後陰莖會需要一段時間恢復對刺激條件反射嘅反應，所以喺恢復期間唔能夠因為刺激而再次勃起，呢段時間亦稱之為「不應期」。但「不應期」嘅長度係因人而異嘅，甚至每人每次所需嘅時間都會有所唔同，平均時間係大概20-60分鐘不等，而有啲人需要嘅時間相對短，可能15分鐘內陰莖已經可以再次充血勃起。主要係受年齡、當日身體狀況、環境、壓力、刺激感、休息足夠與否等等影響，所以每次勃起射精之間只要有足夠時間讓身體休息及恢復，是唔會好影響每次性行為既表現的。
降低陰莖敏感度係想夜晚嗰陣唔好咁快射精
要降低陰莖敏感度係想夜晚嗰陣唔好咁快射精
朝頭早自慰之後 到夜晚性行為嘅時候陰莖的確可以再次充血勃起
但係每一次自慰之後一定要唞返幾日甚至一個禮拜先至能夠去返最硬嗰個狀態
而我就係驚呢個硬度嘅下降（可能未必好大幅度，視乎身體狀況）會令對方冇咁enjoy
Hello
其實硬度會唔會下降，就好似你自己講咁，係視乎身體狀況。硬度要幾時先可以回復到最硬，每個人都會有唔同，甚至同一個人都會因為身體狀況改變而會有唔同，所以都好難一概而論。而其實陰莖嘅硬度都會受唔同心理同生理因素影響，例如有機會會因為有心理壓力而令到陰莖無法維持足夠嘅硬度。平時日常嘅生活作息、飲食習慣、有冇運動等等都會影響到陰莖硬度。
如果想要又延遲射精，又想保持硬度夠嘅話，其實比較難，因為其實喺要荷爾蒙水平升得冇咁快嘅情況下，同時都keep到身體嘅反應。但呢樣嘢都好睇當時收到咩刺激令到性興奮，例如有咩接觸、睇到咩、聽到咩等等，而且同時呢樣嘢都好睇每個人嘅個人體質。
如果你對於維持陰莖硬度有困擾嘅話，其實都有啲日常訓練係可以令陰莖硬度提升，例如凱格爾運動，可以訓練骨盤底肌。首先可以試下去小便嘅時候嘗試中斷尿流，中斷時用力嘅位置就係骨盤底肌。當你搵到骨盆底肌位置之後，可以係日常唔係去小便嘅時候，試下每日練習。一開始可以嘗試收縮嗰組肌肉5秒，然後放鬆5秒，咁樣為之一組，重複呢組動作10次。然後當身體適應咗，可以再加長加多鍛煉嘅時間同次數。另外，亦可以試下「斷續刺激」訓練。係平時自慰嘅時候，當感覺到想射精時就暫停刺激陰莖，暫時冷靜下，等到想射精嘅感覺消退先再繼續刺激，如此類推重複幾次，然後先射精，但都唔好強迫自己長期完全唔射精。
至於你擔心自己可能硬度唔夠而會令對方冇咁enjoy，其實女性生理構造上，陰道後三分一已經係屬於無感區， feel唔到任何接觸，所以小小嘅硬度差異其實都唔會感覺到，所以都唔使太在意呢樣嘢。
希望可以幫到你。