遲左食避孕藥

你好!我上次1月19號食完21日避孕藥 下一排 1月29先食 一下子食左兩粒 呢幾日同男朋友做愛之後會有啲鮮紅色嘅血 同埋有啲暗瘡 想知道係咪有好大機會懷孕?(PS 本身食咗半年避孕藥

Hello你好啊

見到你上一排藥喺19號食完,咁應該26號食新嘅一排藥,但係遲咗三日(即係29號)先食,就算補食兩粒都無用,如果有下一次,應該等下一次有月經時再開始食藥,而且要喺頭一至兩個星期發生性行為時,要用安全套。點解強調要頭一至兩個星期用安全套呢?因為第一次食時,唔確定係咪已經排咗卵,避孕藥就未必發揮到抑制排卵嘅作用,所以就要用安全套,避免懷孕。你依個情況,因為可能已經排咗卵,就需要喺第一日食藥(29號)計起嘅兩個星期都要配合其他安全措施,例如安全套。

至於你依幾日發生性行為,因為遲咗三日食藥,都要重新建立藥效嘅,所以都會有懷孕嘅風險。你可以喺性行為嘅7日後進行驗孕,就可以有初步結果,而喺性行為後嘅11日進行驗孕,就會有更加準確嘅結果。如果你上一次嘅性行為到而家係未過120個小時嘅話你都可以考慮食事後藥,雖然你已經食緊避孕藥,但如果有呢啲漏食或者食完屙嘔嘅情況,都可以食事後藥,減低懷孕風險。

流血方面,如果只係性行為後先岀血,就可能係因為性行為中磨擦太激烈令到陰道擦損,出血情況應該維持一至兩日到,而且出血量都會比較少,未來3至5日都唔好發生性行為住。