我今年19歲 男朋友20歲
我同男朋友一齊左差唔多四個月
每次性行為都有戴套 不過就頻密左啲
之前一個禮拜兩至三次 依家幾乎一個禮拜做四至五次 間唔中一日做兩次
啱啱上網search到如果性行為頻密
會容易有子宮頸癌 霎時間好擔心
記得小五小六嘅時候有打過預防子宮頸癌嘅疫苗
雖然打過針 不過過左咁多年唔知仲有冇用
求解答…
Hello~多謝你嘅提問
首先，子宮頸癌多數係HPV病毒所引發嘅。現時已知嘅HPV病毒大概有超過200種基因分型，當中亦分成高危型（例如16同18型－有機會導致細胞病變，如果唔治療的話可能會演變成子宮頸癌、陰莖癌、肛門癌、直腸癌或口腔癌）同低危型（例如6同11型）－有機會導致性器官出現濕疣，亦即係椰菜花）。只要你有同人發生性行為嘅話，就會有機會感染HPV病毒，如果唔好彩感染到高危型嘅病毒，就有機會演變成子宮頸癌。
至於點解網上面會話性行為比較頻密會比較容易感染呢，係因為HPV病毒係通過性行為嚟傳播嘅，如果同過唔同人發生性行為，而又冇使用安全套嘅話，咁感染嘅機率就會較高（除非雙方都有定期驗身嘅習慣）。而就算只係同一個人發生性行為都好，因為我哋唔能夠保證對方有冇從其他渠道感染到HPV病毒，加上病毒係有潛伏期嘅，所以都係有機會傳染。
假設男朋友之前發生嘅性行為冇用安全套，而對方又有HPV嘅話，的而且確有可能感染到再傳返俾你，如果有做定期檢查，冇咩異樣嘅話其實都唔使太擔心。另外之後嘅性行為如果有呢類擔憂嘅話，都可以考慮用返安全套減低感染性病嘅風險。安全套喺冇過期、冇穿冇漏、啱size（安全套喺使用以緊貼陰莖為準）先發揮到最大功效，而使用時記得將安全套套到落根部最底，並將儲精囊內嘅空氣擠出先用：）
不過就好似我之前所講，HPV病毒有好多唔同嘅變種，唔係每一種HPV病毒都會發展成為癌症，而且發現及時嘅話，情況係會被改變。加上大部分嘅HPV感染都係可以自愈嘅，自身免疫力夠高嘅就可以抑制，唔會引起病變。你可以每年去預約做抹片測試，了解自己嘅身體情況，醫護人員亦會根據你嘅測試結果建議你需要進行測試嘅頻率（例如有啲HPV感染個案，醫生會建議靠身體自身嘅免疫系統去解決，並唔會處方藥物，但會要求每6個月進行一次抹片測試，睇下康復情況）。 
即係話子宮頸癌嘅病變同進行性行為嘅次數，以及同過幾多人發生性行為係冇必然嘅關係嘅。反而係取決於進行性行為嘅時候有冇正確使用安全套。因為HPV呢類病毒型性病其實係透過高風險體液，例如精液、尿道球腺液、陰道分泌物、腸液同血液，直接接觸到性器官、比較脆弱嘅黏膜組織（例如口腔、肛門、陰道、尿道口），特別係當上面有開放性傷口（正在流血）先會有比較大機會可以造成傳播，而且亦必須要其中一方係感染者先有機會造成傳播。所以只要使用安全套或口交膜等外用嘅安全措施，其實就能夠係好大程度上預防HPV嘅傳播。現今醫學昌明，除咗部份病毒感染（例如HIV感染）唔能夠根治之外，其他性病感染可以靠藥物／醫療程序幫助下痊癒；而暫時未能根治嘅感染，都可以靠藥物控制病情，並唔會影響日常生活。希望你了解完之後會安心啲！
最後，HPV疫苗只要打咗就終身有效。現有嘅HPV疫苗分別有2價、4價、9 價，現時市面上比較多見嘅係9 價，佢會針對6、11、16、18、31、33、45、52及58型HPV病毒作出保護（已經包含咗最常有人感染嘅HPV基因分型）。因為你係喺第一次性行為之前打嘅，咁所以疫苗嘅預防作用係最佳嘅，所以可以放鬆返啲。當然HPV疫苗亦冇限只有女性接種，因為HPV病毒對不同性別嘅身體都可以造成影響，所以任何性別嘅人有需要都係可以打架！你不妨建議男朋友考慮接種埋，但係你要俾佢知你有咁樣嘅擔憂並唔係唔信任對方，更加多嘅係想雙方都有保障，為大家嘅健康着想。如果真係擔心都可以同男朋友溝通返，一黎可以更好地保護到雙方，二黎你都唔使再獨自承受呢份擔憂
嗰陣小學我記得係打9價嘅
雖然唔知分別喺邊 同埋會有咩特別
不過打左同冇打嘅人會有咩唔同或者優勝之處？
同埋點解有咁多人之前細個都冇打呢種疫苗嘅？
（定係因為00後女仔咁好彩有得喺小學高年級打免費hpv疫苗
其實如果可以當然想check下 不過一黎唔想比屋企人知 二黎診費好貴 所以都concern緊body check呢樣嘢
正如我上面所講
首先要知道，HPV病毒係有好多種嘅（根據統計有大約170種），我哋係冇一隻疫苗係能夠預防晒所有HPV病毒嘅。所以你打咗嘅9價疫苗，係針對最常見嘅高危型HPV病毒嘅。即係話對於個9種病毒，你身體嘅免疫力係會高啲嘅，冇咁容易感染到。但係對於其餘嗰160種hpv病毒，疫苗係冇包括到嘅，所以就算你打咗HPV疫苗，都有機會感染HPV病毒。不過比起冇打嘅人，你感染以上嗰9種病毒嘅可能性就會比較低。
至於點解咁多人細個都冇打，係因為之前科技冇咁昌明，唔可以咁細個就打疫苗（同新冠疫苗一樣）。但係而家年滿9歲就打得，所以我哋呢啲00後係幸福啲嘅。當然費用都係一個問題，如果唔係學校有得免費打嘅話，出去搵診所打疫苗，價錢大約係$6000左右，都唔係咁多人能夠負擔得起
。
如果你真係好驚自己感染到性病嘅話，可以選擇去以下機構做免費嘅性病測試。
政府社會衛生科服務診所：各類型性病檢查（較全面
，能即時知結果及比藥
）
關懷愛滋：25歲或以下青少年、男男性接觸者－愛滋滋病病毒／梅毒／淋病／衣原體／丙型肝炎
香港愛滋病基金會：愛滋滋病病毒／梅毒／丙型肝炎
再思社區健康組織 (C.H.O.I.C.E.) ：愛滋病病毒／梅毒
*因為最近受疫情影響，建議前往之前，先到相關網站睇下機構有無開～！
暫時可以先留意自己身體有無出現明顯病徵。如果已經出現下體痕癢、小便刺痛、分泌物異常、下體生粒粒等病徵時，就可以先及早求醫。不過如果未有出現明顯病徵的話，都建議考慮三個月（因為無論係HPV定係其他性病，都會有空窗期，即係話喺呢段時間裏面做檢查嘅話係check唔到嘅，而三個月就已經過左大部分性病嘅空窗期）後，再一次過去做一個全面嘅性病檢測，會比較準確 
你好你好
有問題想問
因為記憶好模糊
唔太記得當年小學打嘅疫苗係邊款
好驚唔係九價
印象中打左兩次 唔記得有冇打第三次有d擔心
Hello 一般來講係香港接種過疫苗都會有記錄，你可以去醫健通嗰邊輸入一啲個人資料搵返紀錄，相信應該可以搵返當時嘅疫苗紀錄，睇吓會唔會幫助到你。
性行為之後四個月做性病測試已經係準確㗎喇，不過如果你上次做嘅係愛滋梅毒測試嘅話，就同HPV冇關嘅，所以就未必關事。如果真係好擔心之後嘅性行為會感染到性病，都可以考慮進行性行為嘅時候用安全套，或者都可以考慮接種返相關疫苗，咁就可以將感染到嘅機會降到最低。