同男朋友仆野時有帶套 係途中個套穿咗前端位 但係男朋友嗰陣時係未射的 但係個套入面有尿道球腺液 雖然有咗嘅機率好細 但係真係好驚 唔知去唔去買藥食好
Hello
尿道球腺液裏面有少量精子，再加上性器官只要有直接接觸就會有意外懷孕嘅機會，而家見你嘅情況都建議可以食返事後丸。事後丸係香港係需要醫生處方嘅藥物，因為唔係每個人嘅身體同情況都適合透過事後丸做緊急避孕，而且亦有分不同種類（72小時vs120小時內要服用、一粒裝vs兩粒裝等），所以都建議食之前見咗醫生先。
一般私家診所嘅醫生都會有呢種藥物，其次可以考慮去家計會嘅診所度見醫生睇下適唔適合食事後丸。
請問下去藥房買可以嗎？
食藥好似好傷身咁 但係又驚會有咗
好似我上面所講，事後丸係需要經醫生處方藥物，一個人唔適合食，所以都建議經過醫生檢查身體再配翻事後藥俾你。而因為藥房嘅事藥唔能夠得知佢嘅來源，所以並唔可靠，而且亦都冇醫生進行身體檢查，所以都唔建議喺藥房買啊
如果你係26歲以下嘅青少年可以到家計會嘅青少年保健中心，收費比較平，同埋都會盡快安排服務俾你，但係就記得先打電話去了解預約情況～
都明白你嘅憂慮嘅
，食事後丸的確會擾亂月經周期，令月經延遲，仲有可能出現頭痛，水腫，情緒波動等副作用。不過因為事後丸會被人體吸收同消化，以上嘅副作用多數會喺2-3個星期內消失，而藥物係唔會喺身體累積嘅，所以其實冇一般人所講咁「傷身」。當然如果你係好頻密咁樣服用嘅話就另計
。
如果唔想食藥，又好擔心的話，都可以喺性行為之後第7日同第11日買驗孕棒，跟足說明書指示去驗孕， 咁如果到11日嘅時候係顯示陰性嘅話，就即係冇懷孕。
至於安全套穿嘅原因，主要係因為（1）戴嘅時候可能未有確保完全按實安全套上嘅儲精囊，令空氣有機會喺套入面，喺磨擦同埋擠壓嘅過程中就會令安全套穿左；（2）安全套嘅表面唔夠濕潤，磨擦力太強嘅時候，就會令安全套磨穿；（3）安全套正反面調轉左；（4）安全套尺寸唔合適；（5）安全套已經過左期。
因為你話個安全套嘅前端部份穿咗，咁大機率係因為（1），戴嘅時候冇擠走前端嘅空氣，所以喺抽插嘅時候整穿咗。
如果一直以黎都係無咩事發生，亦唔係試緊新款的話，就可以排除（3）、（4）嘅原因 
你亦都可以檢查一下安全套嘅有效日期，睇下有無過左，過左有效日期就唔好再繼續使用啦～
如果嘗試使用潤滑劑之後，安全套破裂嘅情況都係無改善的話，可能就要考慮一下會唔會選擇試下其他牌子／款式嘅安全套。一方面可以當做試下新野，另一方面都可能身體狀況有所改變，未必再適合使用一直用開嘅安全套款式