大家好，我本來食緊家計會隻欣嘗，今日本應開一盒新的，但發現家中已冇晒存貨 
可能比我錯手以為空盒扔左，請問呢隻藥向藥房買唔買到？ 另外如果買盒其他一樣21日的藥頂住先得唔得？因為我呢個星期都冇辦法去到家計會 
最快都下星期
唔該晒！
Hello 如果你本身係家計會配藥嘅話，佢哋應該會有同你做過身體檢查，而選擇一隻最適合你身體用嘅藥物。所以如果可以嘅話，都會建議食返相同牌子嘅藥物。而你提到嘅欣嘗呢隻牌子，即係Gveza，其實係香港市面上係有得賣嘅，但都會建議去信譽良好嘅藥房購買，避免買到假貨或者唔適合嘅藥物。呢到都會建議，如果可以嘅話，去大型連鎖個人護理商店購買會比較好，例如萬寧或者屈臣氏，因為呢啲店舖都會有註冊藥劑師，如果可以配得返相同牌子嘅話，效用同埋真確性都會更加有保證。
如果你真係想轉另一隻藥，其實都唔會影響到效用，但係就可能會帶來唔同嘅副作用，例如常見副作用就包括噁心、體重增加、頭暈、水腫同情緒轉變等等，當然都未必一定會有呢啲副作用，呢啲都好睇每個人個人體質。而如果你想轉藥嘅話，都一樣會建議你去信譽良好嘅藥房，或者大型連鎖個人護理商店購買。同埋最好當你之後得閒去到家計會嘅時候，都同返醫護人員講你轉左藥同埋你嘅情況，諮詢返相關意見，咁就會最好啦。