自己本身有pcos
因為陰道多左好多分泌物所以去左睇社會衛生科
點知一check就出事 懷疑係菜花
暫時開左隻1g嘅阿奇霉素俾我返去食
但係食完之後都係冇改善⋯啲分泌物仲係綠色
同時因為自己有菜花所以覺得好驚
所以去左另一間婦科check 佢一口咬定話係菜花 但係佢係冇做過酸醋測試
但係我自己係單一性伴侶 全程有用套 男朋友去check都話佢冇花花
自己一生人都淨係得一個性伴侶
完全唔知點解自己會中⋯而且仲要係陰道入面 外陰完全冇
同時都好想自己啲分泌物唔係綠色 好想快啲醫返好自己
琴日仲要有啡色分泌物 但係今日就冇黎m⋯
依家覺得好驚 我應該點做先可以醫返好自己⋯
Hello 理解你會感到驚或者會有唔開心，可能我呢到都講少少有關「椰菜花」嘅資訊。
其實「椰菜花」係性病疣嘅俗稱，佢係由人類乳頭瘤狀病毒(HPV) 引發嘅。當高風險體液，例如精液、尿道球腺液、陰道分泌物、腸液同血液，直接接觸到性器官、比較脆弱嘅黏膜組織，例如口腔、肛門、陰道、尿道口，特別係當上面有傷口都可能會傳染到。另外，性器官、黏膜組織或開放性傷口接觸到患者生嘅疣都會有機會傳播。另外，因為性病疣是透過性行為時接觸到的皮膚傳染，所以即使有使用安全套，亦不能夠完全減低感染風險。
而其實性病疣雖然無法被根治，但都可以治療，包括透過藥物治療，例如使用可以直接消除性病疣的藥物（外敷）、或者免疫調節劑（外敷／注射），亦可以透過手術治療，例如冷凍療法、電燒、雷射、手術切除等手法。但因為你嘅情況係生係陰道入面，就未必所有療法都適合。所以都建議可能可以嘅話，就再睇多次其他嘅醫生，一來其實而家都未100%肯定到係咪真係有椰菜花，睇多個其他醫生可以更加確定係咪真係患有性病疣，二來都睇吓會唔會有其他更好嘅治療方法。你都可以特別留意吓嚟咗經期之後會唔會有變化或者改善。咁呢段時間就唔好再進行任何性行為，避免任何交叉傳播，同埋都易啲斷尾。同埋都要用護墊墊住分泌物，亦都要勤啲換護墊，如果唔係就好難斷尾。
而如果真係最後確診係性病疣嘅話，雖然目前尚未有藥物能徹底殺死HPV病毒，但對抗性病疣主要靠身體的免疫系統對抗病毒，唔少患者嘅性病疣都會係兩年內消失。但因為佢係無法被根治，所以都係會有機會會復發。如果係女性，就要定期接受子宮頸抹片檢查，因為如果女性受感染嘅話，都有機會會係感染咗高風險型HPV病毒，係會有機會帶來子宮頸癌，所以都要按醫生指示定期接受子宮頸抹片檢查，預防子宮頸癌。
最後，如果可以嘅話，會唔會都可能考慮叫埋男朋友一齊做個檢查？畢竟都可以為大家做過保障，唔係唔信任，而係希望未來可以更加好咁保護大家。同埋其實性病係有空窗期同埋潛伏期，性病疣嘅空窗期最長14日，如果未過空窗期嘅話，就算做檢查都未必檢查得到嘅。而潛伏期就大約2星期到8個月，甚至可能可以長到1年，咁病徵係潛伏期期間係唔會出現，所以有機會自己已經感染咗，但病徵未出現而唔知道已經受到感染。所以如果可以嘅話，兩個一齊去做一個更加詳盡嘅檢查，可能會更加好。
希望可以幫到你。