話說前日同女朋友就興奮咗 但係都驚懷孕 咁選擇咗體外摩擦咁啦 咁應該就冇接近到陰道口嘅 咁我肯定自己冇射啦 咁應該係前列腺液 但係女朋友擔心我啲前列腺液有精子 本人都好驚佢會懷孕 但係宜家唔清楚使唔使食藥同埋想知懷孕機率會唔會好大
同埋佢週期嚟講 今日黎m 但係冇黎 佢亦都話胸漲得比平時明顯 係咪可能已經有咗？
Hello~多謝你嘅提問
因為陰莖係性興奮嘅時候會分泌尿道球腺液，內含少量精子，所以就算冇插入，冇射精，都有機會導致懷孕。不過睇返你描述嘅情況，懷孕機率係好低嘅，所以唔建議食藥。因為事後丸係高劑量嘅荷爾蒙藥物，會擾亂月經周期，令到經期延遲，同埋會造成短期嘅副作用，所以一個月經周期內最多只可以食一次，建議風險較高嘅時候先至服用。你可以喺性行為之後嘅7-11日進行驗孕，而喺11日之後驗嘅話個結果就最準確。
至於月經延遲嘅原因有好多，體重過輕，壓力大，生活唔規律…都會導致月經遲嚟。除非月經比起平時遲咗三個星期以上都未嚟，又肯定冇懷孕，先至需要睇醫生，等醫生考慮會唔會處方荷爾蒙藥物畀你女朋友去催經。現階段可以再等下先～
另外見到你有提到
胸漲其實係經前症狀嘅一種，即係暗示緊佢就快嚟m，如果嚟咗月經嘅話就代表冇懷孕啦！
最後都需要提提你，只要性器官有直接接觸，無論有冇插入，有冇射精都好，都會有懷孕風險。所以無論進行任何形式的性行為，都要全程使用安全措施，先至可以保障到雙方嘅安全🫶🏻。