會懷孕嗎?🥲

27/1同18/2同男朋友做,冇戴套冇射精,好似插咗少少,但有前列腺汁液。上次來m係22/1至26/1,今個月expect來嘅日子係20號,經期一向都準,咁會唔會有機會中?:smiling_face_with_tear:今日上網睇先個前列腺汁液都會有精子,好驚中:smiling_face_with_tear:

Hello~多謝你嘅提問:heart:因為陰莖係性興奮嘅時候會分泌尿道球腺液,內含少量精子,所以就算冇射精,都有機會導致懷孕。因為你哋總共發生咗兩次唔安全嘅性行為,所以呢度建議你先進行驗孕。通常我哋會建議喺性行為之後嘅7-11日進行驗孕,而喺11日之後驗嘅話個結果就最準確。因為而家距離你27/1嗰次性行為已經過咗11日以上,所以而家驗孕嘅話就可以知道嗰次性行為究竟有冇導致懷孕。

如果結果係陰性嘅話,咁我哋嘅concern就剩返18/2嗰次性行為。因為18號距離,依家只係過咗3日到,所以如果擔心嘅話可以考慮服用事後丸。事後丸最長可以喺唔安全嘅性行為之後嘅120小時內服用,不過因為事後丸會擾亂月經周期,令到經期延遲,同埋會造成短期嘅副作用,所以一個月經周期內最多只可以食一次。如果唔想食藥嘅話就可以考慮喺呢次性行為之後嘅7-11日進行驗孕。好似我上面所講,11日之後驗個結果就最準確啦!

至於月經延遲嘅原因有好多,體重過輕,壓力大,生活唔規律…都會導致月經遲嚟。除非月經比起平時遲咗三個星期以上都未嚟,又肯定冇懷孕,先至需要睇醫生,等醫生考慮會唔會處方荷爾蒙藥物畀你去催經。現階段可以再等下先~

最後都需要提提你,只要性器官有直接接觸,無論有冇插入,有冇射精都好,都會有懷孕風險。所以無論進行任何形式的性行為,都要全程使用安全措施,先至可以保障到雙方嘅安全🫶🏻。