昨晚10:30pm食一盒中的第17粒Yaz, 凌晨2am-2:30am 左右肚屙了一次, 需要補食嗎? 我每晚都很準時10:30-10:45pm 內食藥的, 大概食了一年半有多左右,謝謝。
補充: 然後早上7:20am 左右也小痾了一次
Hello~多謝你嘅提問
今次嘅情況，係喺服藥後4小時內肚痾，因為唔肯定身體係咪已經完全消化咗粒避孕藥，藥物有可能因為未完全消化及吸收曬，而經肚痾排出體外，因而影響藥效 
。所以建議你喺12個小時內盡快補食，並且繼續服用當日嘅藥丸，或者喺第2日連食2粒避孕藥（即係話你可以喺今晚食藥嘅時候一次過食兩粒藥），咁就可以確保到藥效。
呢度都會建議你買多一排避孕藥擺喺屋企作補食之用，避免因為係同一排藥攞咗一粒嚟補食，而出現成個月食少咗一粒嘅情況。
我今早2月21日既上午9:15補食左一粒，咁樣正確嗎?
我20號10:30pm食藥
21號凌晨2:30am肚痾
21號早上7:20am小痾多次
21號早上9:15am 補食左一粒
咁樣係12小時內補食嗎? 咁樣ok嗎?
冇錯，然後照平時，即係每晚10:30-10:45食一粒避孕藥，咁你今日總共會食咗2粒避孕藥。而你食緊個盒避孕藥會少左一粒藥，到食曬白色無藥性藥丸後或者完成停藥之後，照正常開新一盒藥食就可以了。
想問下上次補食既情況會唔會有機會因為都食多左粒影比到今個月經期? 我應該係尋日黎m但仲未黎，有啲擔心。
Hello~係有咁嘅可能性嘅，因為食緊避孕藥嘅時候雖然我哋身體冇排卵，應該唔會有月經。但係因為藥物嘅設計者，希望我哋盡快適應到食避孕藥嘅規律，所以設計左停藥期，令身體嘅荷爾蒙水平降落嚟，呢個荷爾蒙嘅轉變就會導致撤退性出血，出血嘅情況同嚟月經差唔多，但係經血量同埋持續嘅日數就會較少。所以可能係因為你今個月經周期食多咗一粒避孕藥，令到身體嘅荷爾蒙水平仲維持係一個較高嘅位置，未嚟得切喺停藥期嘅時候降落嚟，所以先至仲未出血。基本上只要耐心等待就ok🫶🏻
謝謝。但想再問問，正常我食Yaz 有4粒無藥性白色藥，我之前都係食完第二粒白藥(星期三晚服用)就會黎m(姐係尋日星期四)，但今日都未黎。而我今晚就係食最黎一粒白藥，聽晚就開新一盒。咁會唔會導致今個月無月經呢?
呢個情況係有可能發生嘅，不過正如我上面所講，食緊避孕藥嘅話係唔會有月經嘅，只會有撤退性出血。因為佢呢個設計係想令人快啲適應食避孕藥嘅規律，所以就算一個月冇出血，對身體都係冇影響嘅。
所以我今個月既情況應該係無漏服對嗎？即使今個月無出血，懷孕機會大嗎？唔好意思係咁問，因為我每日食藥好準時小心，好留意有冇痾嘔肚痛影響，每次痾嘔都會特別小心睇下有冇需要補服。所以今次無出血情況令我比較擔心，謝謝你。今次無出血情侶懷孕機會大嗎？我呢幾日都有驗孕，係陰性。謝謝你。
好似上面同事所講，如果呢一個月冇出血，其實對身體冇乜大嘅影響，亦唔代表會減低避孕藥效。如果呢幾日都有進行驗孕，而且結果係陰性嘅話，相信結果都非常準確，所以唔需要太擔心。