有關擔心性病問題

你好!有個問題想問…
我上星期同一個陌生人發生左一夜情,插入前,佢有掂過自己既陰莖之後,再放入我既陰道指交。我亦有同佢舌吻,我嘴唇因為乾燥有一個細小嘅傷口,無流血的。
插既過程全程有帶套,但係佢一開始嘗試帶嘅時候掉轉咗,之後就即刻反轉帶返正,之後先開始插入。
我想請問如果對方有性病,咁樣我得到性病既機會大嗎?謝謝!

Hello 根據你所講嘅情況,都係有少少感染性病嘅風險架。

首先,性病主要嘅傳播途徑透過體液,例如精液、腸液、尿道球腺分泌(Pre-cum)、陰道分泌、血液,接觸過身體比較薄嘅黏膜組織,例如肛門、口腔、陰道,或者傷口就有機會傳播到病毒。

首先,舌吻方面,口水本身並唔會傳播性病~ 但係如果有進行口交,有體液接觸到你嘴唇上嘅傷口,咁病菌/病毒就有機會經由傷口進入體內~

而掂過陰莖嘅手指進入陰道,同埋戴套時掉轉咗再直接反轉戴返,呢兩個情況都係有機會會將性興奮時(射精前)分泌嘅尿道球腺分泌(Pre-cum)帶入體內,繼而造成感染~ 如果對象有性病,呢個情況下都有相當風險架!

如果有憂慮嘅話,可以做性病測試。唔同嘅非政府機構,例如關懷愛滋、香港善導會水銀星三號、香港愛滋病基金會、再思社區健康組織等等都有提供性病測試,或者你都可以去私家醫療服務中心或者衞生署社會衞生科診所進行測試~ 不過性病係有空窗期的,就算真係感染到有性病,而家即刻去驗都係冇咁快驗到嘅,起碼都要等三個星期之後先至會驗到~

希望解答到你嘅疑問~

感謝你既回答。
我會做返test ,但想請問風險有幾大?因為我好焦慮…同埋有邊種性病係有風險得到?會唔會有愛滋?

Hello 其實都好難答實到你風險有幾大,因為相關嘅行為都的確係會有機會傳播到性病,同埋都要視乎你性行為嘅對象係咪真係有性病等等,所以其實好難答實你風險有幾大,只能夠講係有風險。

而只要有唔安全嘅性接觸,就會有機會傳播到性病,包括淋病、梅毒、愛滋病等等,但前提係你嘅性對象都有相關性病。不過而家其實都唔可以肯定你係感染到性病,一切都要等之後做咗性病測試先可以知。

其實而家科學好昌明,好多性病都已經可以醫到,雖然唔係每隻都可以痊愈,但例如淋病、梅毒呢啲都係可以治療嘅,而愛滋病雖然無法根治,但都可以被治療。而且,性病上有個概念叫U=U,意思係當體內的病毒量下降至不可檢測的水平(Undetectable),這個狀態下,體內的病毒將不能夠透過性接觸傳播予他人(Untransmittable)。所以即使不幸被感染都不至於世界末日,希望都可以減輕到你嘅焦慮。

最後都提醒返,好似上面位同事講咁,以後進行性行為都要做好安全措施,好好保護自己啊。