我17歲,有咗bb.驗咗依家3weeks…
我想問家計會藥物流產係咪一定要家長簽名？有冇得唔俾屋企人知
我4月尾先夠18歲。
但係到時已經12weeks…
或者我男朋友簽名得唔得？佢夠18歲
Hello~回應返你嘅問題，基本上去家計會做檢查為準備墮胎嘅過程，都係唔會通知家長，因為佢哋唔會突然間有家長嘅聯絡方法，但係如果真係去到要墮胎嘅時候，家計會都會提議返你去通知你嘅監護人，因為成個手術嘅過程都有風險，亦有啲女仔佢喺過程當中適應得唔係咁好嘅話，係有可能會有生命危險… 都見到你有講好唔想畀屋企人知道，明白到每個屋企都有要面對嘅情況，所以如果你真係唔想比屋企人知都係明白嘅。
但因為墮胎嘅成個過程其實對女仔嘅心理同生理都會造成好大嘅影響，所以都你喺希望有屋企人嘅支持下先去做呢個process。雖然無論你幾多歲，家計會職員都係唔會喺未得到當事人同意下通知家長或報警。不過因為終止懷孕始終都係醫療程序嘅一種，如果未滿18歲，家計會都係會建議求助者自行通知家人，去確保安全。如有需要，輔導員亦會提供相應嘅協助去支援求助者。
喺家計會進行終止懷孕的話一般都會需要進行至少3次到診：
第一次：由醫護人員了解身體狀況、檢查身體、評估懷孕週數、講解可做的選擇和講解避孕方法，會見輔導員進行情緒支援、了解受助者意願同選擇。
第二次：受助者做出決定，進行轉介／終止懷孕醫療程序，輔導員提供心理輔導
第三次：術後覆診
按照受助者情況，覆診次數都會有所不同。收費方面大概需要合共$4400-6100，排期時間需要2－3星期。不過，因為求助者人數眾多，排期時間有機會要更加耐都唔一定。而如果受助者身體情況唔適合喺家計會診所進行手術，家計會會轉介去公立或私家醫院。
明白如果真係意外懷孕，你唔希望比屋企人知道，因為覺得屋企人一定會好嬲。但終止懷孕呢個決定都真係需要考慮好多唔同事，醫療程序亦會對身體造成一定影響，價錢亦唔平，亦唔係話即刻馬上就可以進行手術。其實屋企人嘅反應未必係負面，當然佢哋一定會有啲情緒，但其實我哋遇過好多人嘅屋企人知道咗之後係好願意提供支援。所以如果真係發生咗，都希望你哋同考慮屋企人講，一齊商量。如果有需要，我哋亦可以幫你哋轉介去有提供支援嘅機構，例如 母親的抉擇 或者 青躍 ，一齊商討可行嘅方案。
糖不甩亦會一直係度為你提供支援。無論發生咩事，你都唔係孤單一個，只要你願意，有好多人都好樂意為你提供協助㗎！