小妹19歲 上個月確診有甲亢 同埋上個月做完扁桃腺切除手術 雖然甲狀腺同埋扁桃腺康復進度良好 但係唔知點解尋晚我照一照喉嚨 發現上顎有好多一粒粒嘅白色點 喉嚨入面都有 之前上網見過有性病嘅喉嚨 同我喉嚨好似樣 但係早排做咗性病檢測係陰性 應該唔太關事？唔清楚。。
吞口水既時候 痛就唔係好痛 甚至係冇乜痛楚 亦都冇紅腫 睇落去好似甩皮咁 但係又唔清楚係咩嚟 屋企人話會唔會係食甲亢藥嘅副作用 但係早排食嘅時候都冇事 尋日複診醫生都話甲狀腺唔同方面嘅指數都回復返正常水平
係感染？定係有性病？定係食甲亢藥嘅副作用？
因為上個禮拜五同男朋友去咗食牛肉放題 之後先知道原來食牛肉對於我呢個甲亢患者係好有「毒性」食完之後有風疹 不過好輕微 食左治敏速已經好好多 好大機會因為食太多牛肉先會咁 但係喉嚨咁樣真係完全唔知發生咩事 好驚好焦慮
本身book咗後日睇醫生 但係尋晚同今日個心好亂 好焦慮 所以上嚟問吓你哋意見
圖片如下
本身耳鼻喉科醫生話做完扁桃腺切除手術之後 喉嚨會有塊白膜 兩三個禮拜之後就會自己脫落 但係我見呢張相 唔知啲白膜去咗邊 定係呢啲白色一粒粒係白膜？睇落去就唔太有可能 因為本身唔會係一粒粒 係一塊塊 不過霎時間發覺塊白膜冇咗 定係已經甩咗？真係好亂。。。
啱啱醒起 如果呢啲係發炎症狀 可能同上個禮拜食放題有關…因為湯底係有少少辣 如果係既話就怪自己冇戒口
不過而家最困惑係唔清楚呢啲係發炎定係其他野 所以想喺度問你地意見
Hello
知道你好擔心，而其實扁桃腺手術後都的確會有白斑或者白膜嘅，都係正常現象，大約一至二星期後佢就會自行脫落，但呢個現象都比較多會係手術後好一兩日出現，未必會等咁耐先出現。
最有可能，係你講咁，食完牛肉，之後嘅其他副作用發作。咁呢段時間就唔好任意挖喉嚨，避免出血。
至於你驚感染到性病，我呢到首先講少少有關性病嘅資訊先。常見嘅性病傳染途徑，係高風險體液（包括：精液、腸液、尿道球腺分泌（Pre-cum）、陰道分泌、血液）透過比較薄的黏膜組織（包括：肛門、直腸、口腔、陰道、眼睛、鼻腔）或者傷口直接接觸到高風險體液而傳播。而要傳播到性病，就要睇你有冇曾經同有性病嘅伴侶有相關接觸，或者曾經有機會經歷過呢啲傳染方式。
而你話你做過性病檢測，會係喺邊度做？因為其實性病係有分潛伏期同空窗期嘅。空窗期，係指身體已經受到感染，但係病毒量仲未能夠被醫學檢測到；潛伏期就係只身體開始出現症狀。所以一般來講，都會建議喺高風險性接觸嘅兩星期之後，先進行性病檢測，先比較容易檢測到準確有冇性病。而且喉嚨有白色一點點都唔係常見嘅性病病徵，所以都未必會係呢個方向。
但單憑呢度都冇辦法確認到到底你咁樣係咩情況。建議你過幾日睇醫生，都可以同佢講返詳細嘅相關情況，咁可以得到較準確嘅診斷。
希望幫到你 
性病檢測方面 我係性行為後相隔半年再去做檢測～我係去關懷愛滋做
佢地話我空窗期前係冇感染性病嘅～（可能講得唔好 唔好意思
因為一般性病嘅空窗期係大約三個月，所以如果係性行為之後相隔半年驗嘅話，咁個結果係足夠準確嘅，唔需要擔心係因為感染咗性病嘅原因。
不過因為始終我哋唔係專業嘅醫生，所以單憑文字同埋照片係唔足以落到一個準確嘅判斷嘅，等你複診嘅時候問返醫生嘅意見會比較好。
