關於流啡問題

你好吖,有問題想請教下!
因為2月27發現有流啡同有少少血絲嘅情況(用護墊就可),但我經期係2月13至2月19,平時都好穩定,但到2月27到今日3月4都仲有啡色嘅分泌物,流量唔多,而2月23有同男友發生過性行為(有用condom同已經第二個月食緊避孕藥),好擔心係食避孕藥會流啡,排卵期流啡定係有咩其他健康問題會咁,所以想問下呢個情況會唔會係唔正常?
同埋都想去做子宮抹片檢查下,都想問下如果係呢個情況去做會唔會有咩影響?

Hello~

睇你嘅情況,食避孕藥造成嘅流啡或者排卵期流啡都有機會,甚至可能係前者導致後者呢~ 先講吓呢兩種情況:

1)避孕藥造成嘅流啡:

服用避孕藥初期都需要比身體大概三個月至半年嘅時間適應,而服用初期有機會出現常見嘅副作用,例如流啡/點狀出血。當身體適應咗藥物,呢啲副作用就會消退(一般一至三個月後,情況因人而異,有啲人可能需要更長嘅時間去適應,所謂「唔超過6個月」都只係理論)。

2)排卵期出血造成嘅流啡:

你今次嘅陰道不規則出血(27/2)距離上次嘅月經週期(13/2)係14日,約兩次月經中間嘅日子。所以今次嘅出血,都有機會係因為排卵期出血(ovulation bleeding / spotting)引起。排卵期出血就係指一般月經週期比較穩定,而於兩次月經之間,出現經間期出血嘅情況。

部分女性於排卵期嘅時候,有機會出現排卵期出血嘅情況,一般血量較少,出血日子亦會比正常月經少(一般約2-3日),分泌物顏色呈咖啡色或帶少量血絲,有機會伴隨輕微嘅腹痛。出現排卵期出血嘅原因,有機會係因為雌激素於排卵期期間,突然出現波動,激素短期下降,令子宮內膜失去激素嘅支援下,令部分子宮內膜剝落而出血。

綜合返嚟睇,由於你開始食避孕藥冇耐,身體都仲適應緊荷爾蒙嘅變化,會出現經期混亂同出現不規律嘅出血狀況/啡色分泌物都係正常嘅,而你所見到嘅啡色分泌物好大機會就係荷爾蒙變化造成嘅排卵期出血,因為後者嘅成因正正就係荷爾蒙唔穩定~

但荷爾蒙唔穩定亦都有可能係因為其他婦科疾病(例如子宮息肉、子宮頸疾病等)引起,又或者可能係呢隻牌子嘅藥唔適合你身體,所以如果流啡嘅情況持續,又或者出血量增加,就建議儘快睇醫生做個詳細嘅檢查喇~ :woman_health_worker:t2: :man_health_worker:t2:

至於子宮抹片檢查方面,經期期間就唔太適合,以你目前嘅情況,如果流啡嘅量唔多,其實都可以做嘅,如果呢幾日停咗流啡先去做就更加準確喇!不過提示返,檢查後幾日都有機會流啡或者有帶血絲嘅分泌物,係正常反應嚟架~

希望幫到你啦 :revolving_hearts:

好唔該你!

咁通常大概幾耐會完流啡情況,因為都成個星期,定係可以再觀察多排都可以?因為好擔心係子宮頸/朱古力瘤個啲。咁如果以我宜家呢個情況嚟睇,係米可以唔洗咁擔心住?

都可以觀察多一段時間,如果流啡嘅情況持續,或者喺下一個月經周期又出現同樣嘅情況,就建議可以諮詢下醫生嘅意見:sparkles: