想知道避孕藥相比起避孕針副作用係咪比較細
我已經打左連續兩個月避孕針(一個月打一次個款)，打完針第一次黎m覺得血量少左顏色都變啡左少少，分泌物比平時黎嘅時間長左。
依家有打算轉返食避孕藥。
Hello，知道你有打開避孕針，你一個月注射一次嘅應該係混合荷爾蒙避孕針，由於初初打針時身體需要去適應人造荷爾蒙，接受注射期間有機會因為體內荷爾蒙改變而出現月經不規則、月經流量減少、或閉經等副作用，只要適應左後經期會變得規律化。另外，混合荷爾蒙避孕針亦都有其他嘅副作用，包括體重增加、頭痛、頭暈、乳房漲痛，因此如果有出現以上情況都屬於正常，不過如果情況持續或者加劇咗，就要盡快睇醫生。同埋目前你使用避孕針只有兩個月，其實可以再觀察長少少時間，等身體適應後，如果仍然覺得唔合適，才考慮轉換其他避孕措施。
至於避孕藥嘅副作用，主要係服用初期發生，荷爾蒙類避孕措施嘅適應期一般都係3至6個月。身體就會慢慢適應藥效，令副作用嘅情況慢慢紓緩或者消失。服用初期，可能身體喺適應階段時，會出現不規律嘅陰道出血，月經週期日數都會比較唔穩定，而且都會伴隨上面提及有關避孕針嘅副作用。但係隨著慢慢適應，經期一般就會變得穩定。
想了解更多有關口服避孕藥嘅資訊，都可以參考埋《衛生署藥物辦公室－口服避孕藥》嘅資訊，裏面都有提及避孕藥嘅選擇，同埋服用期間有咩情況需要留意：https://www.drugoffice.gov.hk/eps/do/tc/consumer/news_informations/knowledge_on_medicines/oral_contraceptives.html