上個月27號m到大約今個星期日（5號）開始嚟完m 冇m血
平時m到規律 都係隔30-31日到 正常3月1x號係排卵期
然後同男朋友見係安全期 無套插左幾下 不過冇內射
但係唔知點解今日左下腹悶悶作痛 好驚係有左
有少少似m痛嘅feel
但係m完左後幾日下腹忍忍作痛係咪正常…？
定係因為尋日早午餐空肚飲左一包無糖豆漿
夜晚飲一杯脫脂奶 所以下腹痛？
求解
幾個鐘前已經去過一次大便 想去多次但係又暫時痾唔出 係咪便秘問題？
補充返：同男朋友無套幾下係嚟m第七日(3月5號)即係嚟完m第一日
？
Hello~首先， 坊間所講嘅安全期係以一個週期28日去計算，而一個週期係由嚟月經第一日直到下一次嚟月經前一日為止。係一個28日週期之中，安全期嘅計算係假設咗身體會係第14日排卵，所以週期嘅第1－7日以及21－28日，亦即係所謂嘅月經前7後7日會係所謂嘅安全期。
但係安全期並唔可靠，原因係：
1）唔係每個人嘅週期都係28日
2）即使係28日週期嘅人都唔一定係第14日排卵
3）要去到月經出現我哋先可以計算上一個週期係幾長，再大概估算上個周期嘅排卵日同「安全期」係幾時，唔能夠係未出現月經就單憑計算日子準確知道係幾時排卵
而且，有啲週期較短嘅人甚至會係月經期間或月經月結後就排卵，而精子進入體內最長可以生存3－5日，如果咁啱遇上身體排卵，就有機會造成懷孕。
所以使用安全期避孕並唔係一個有效的方法。因為月經週期可以被太多因素影響，變相亦較難準確推算出一個絕對『安全』的日期。加上每個人排嘅時間都不同，而且月經同排卵有機會撞期，所以即使剛剛完結月經亦有機會受孕。最理想是在有使用避孕方法的情況下才進行性行為。
人嘅身體是一個非常複雜的系統（否則，我們嘅生物學家、生理學家都唔能夠保住佢地嘅飯碗了），生理週期、排卵與否實在同太多的因素相關。所以安全期避孕實際上也唔見得係一個非常可靠的避孕手段。而且往往要待經期出現才能推算已發生的排卵期及安全期，無辦法預計下一個月的「安全期」。
如果真係要計算排卵期/安全期，首先你要喺醫生指示底下每日去記錄身體同分泌嘅狀況，同時間亦都需要用基礎體溫計（唔係普通市面嘅體溫計）去記錄同比較每日嘅體溫，再加上要每日都用排卵棒去測試，先可以比較有系統地推斷到幾時排卵期，之後先可以大約知道安全期係幾時。
所以結論就係其實我哋好困難先至有機會知道係咪安全期，而呢個唔確定亦都令到用安全期嚟避孕並不安全。
雖然一般來講排卵後卵子大概只可以存活兩至三日，但精子可以喺子宮存活最長五日，呢啲時間亦會因為雙方嘅身體狀況而有唔同。所以，係唔能夠準確知道其實到底幾時係排卵期嘅情況底下，加上卵子精子嘅存活率都係會受外在因素影響，即使係排卵期之後嘅日子，都唔代表係完全安全。呢個亦係所謂「安全期」唔一定安全嘅其中一個原因。
只要性器官有直接接觸，就會有懷孕風險。特別係無套性交，就算冇內射都好，因為陰莖射精前會分泌尿道球腺液，內含少量精子，都有機會導致懷孕。因為你係喺3月5號發生唔安全嘅性行為，而事後丸喺性行為之後嘅72/120小時內服用都係有效嘅。所以如果有需要的話，仍然可以係得到醫生處方後，服食藥物作緊急避孕嘅。
如果唔想食事後丸嘅話，就可以考慮喺性行為之後嘅7-11日驗孕。驗孕棒嘅使用方法其實每個牌子都有少少唔同，要等候幾耐要睇返說明書呀。使用方法通常就係拆開包裝之後，將驗孕棒取尿嘅區域用尿液沾濕，要維持1-2秒確保取尿嘅區域成功沾濕，之後就根據說明書上面嘅指示等待一段時間，如果對照區出現一條線就係無懷孕，如果出現兩條線就係懷孕。如果對照區無出現任何線嘅話，有機會係驗孕棒失效呀，需要買新嘅驗孕棒做多一次。雖然驗孕棒最快可以係性行為之後7日就可以有初步結果，但係比較準確嘅時間都係預計受精時間11日之後。同埋記住係驗孕之前唔好飲咁多水，因為會稀釋咗尿液裡面雌激素嘅比例，可能令結果唔準確。
其實驗孕棒係透過檢測尿液中嘅HCG(人絨毛膜促性腺激素)含量嚟判斷有無懷孕，因為只有受精卵成功著床嘅女性身體先會會開始分泌HCG，通常著床時間就會係6-9日，咁通常7日就會有初步嘅結果，11日嘅時候受精卵已經完全著床成功，體內嘅HCG分泌亦都足夠檢驗出有無懷孕架啦。
而因為事後丸係香港係需要醫生處方嘅藥物，而且有分性行為後72小時或者120小時內服用兩種，如果決定服用，建議盡快揾醫生求診。可以選擇去家計會診所、普通私家門診或者婦科診所。
至於你話覺得肚痛，我哋呢度單靠文字係冇辦法知道個原因嘅，不過因為你5號先發生唔安全嘅性行為，就算精子同卵子真係結合左，成為受精卵，都冇咁快會出現懷孕初期嘅症狀嘅。所以你今次肚痛應該同懷孕無關，如果真係好唔舒服嘅話，建議搵返醫生求診。
最後，如果未ready有BB嘅話，都係做好安全措施最穩陣。如果想唔用安全套嘅話，可以考慮服用事前避孕藥，或者打避孕針。不過都要提一提你，使用安全套唔只能夠避免懷孕，仲可以避免性病嘅傳播，保障雙方嘅健康。所以都希望你做足安全措施之後，先至進行性行為🫶🏻