仲未黎m🥲

你好,今日係3月8號,已經第42日未黎m,以往都係平均30日黎一次,而前幾日持續流啡,大概3日倒,量少,用護墊都足夠,而尼幾日我有啲病病地,上網睇話係經行感冒,因為氣血不足所以黎m前特別容易感冒,我以前睇過中醫都話我有氣血不足既問題,我自己以為流完啡之後幾日就會黎m,但係又冇,所以我都唔太確定果幾日流啡會唔會其實已經係黎左m?如果去到第50日都未黎,我係咪應該要睇醫生:pray::pray:

Hello 知道你一定好擔心啦,見到自己月經咁遲都未嚟。

首先,都想問返最近有冇都曾經發生過性行為?因為如果有嘅話,就有機會係因為有懷孕機會而導致月經冇嚟。如果係咁嘅情況嘅話,你都可以選擇自行驗驗,喺性行為之後7至11日之後驗驗,如果係7日之後驗驗會有初步結果, 11日之後就會有準確嘅結果。

如果排除發生過性行為,而導致懷孕嘅情況嘅話,其實情緒壓力、生活作息、各種身體健康狀況等等都有可能會影響咗月經長短,有時會早啲嚟,有時會遲啲嚟。一般而言,月經周期維持喺21至35日都係正常可接受範圍,但係你而家去到42日都未嚟M,就似乎唔係太正常唔太健康。會唔會最近都有飲食失調,或者好大好大壓力嘅情況?或者你會唔會都有食過同荷爾蒙分泌相關嘅藥物,或者抗生素等等?因為如果有嘅話都有機會會令成個月經周期延遲咗。

另外,你提到你有流啡嘅情況,唔知係咪已經等於嚟咗m,呢度都可能要你自己留意番,究竟嗰幾日「流啡」所流出嚟嘅分泌物,似唔似你之前平時嚟嘅m?如果唔似嘅話,其實就有機會係排卵性出血。另外,再綜合埋咁耐未嚟m,就可能係內分泌失調或者係還有其他婦女或者子宮疾病,例如卵巢多囊症。所以如果你真係50日都仲係未嚟嘅話,都會建議你可以睇醫生諮詢返醫生意見,可能今日檢查會唔會有相關嘅疾病,或者都可以開返催經藥俾你食等等。另外,你都可以去家計會做返個詳細嘅婦科檢查,咁就會更加放心。

希望幫到你啦 :heart_hands:

3月13日朝早用驗孕棒check係一條線,我自己都好肯定唔會係有左bb,上一次黎m已經係1月25號,今日係第47日未黎,從來都冇試過咁耐未黎m,最勁果陣都係42日,想請問除左睇醫生會唔會有其他方法黎到m?如果唔理佢既話會唔會有日自己就黎?

其實最好嘅方法都係去睇醫生,畢竟依家呢個情況唔係太健康,睇醫生除咗可以開啲催經藥比你,方便你快啲嚟到月經,亦都可以清楚自己發生咩事。畢竟其實咁多日冇嚟M,有可能係身體出現咗啲唔好嘅狀況而造成。若然不幸身體有咩唔舒服或者嚴重嘅病,及早求醫先可以趁早治療。

如果你想試下自己催經,網上面都有一啲飲食療法,例如飲杞子桑椹子水、生薑紅糖茶、玫瑰花茶等等呢類催經,亦可以試下上網搵下唔同催經穴位,再按下睇下會唔會有幫助。