早幾日有同女朋友唔沖涼同冇套發生性行為，做完當晚有痕癢，所以有抓下，唔肯定係咪因為嗰時抓損咗，跟住而家發現下體有一點點紅色嘅傷口，吾肯系咪性病定係平常抓損，女朋友自己就冇發現佢有任何異樣
Hello~多謝你嘅提問。首先性病係屬於傳染病，不分年齡、性別、種族，一般透過性接觸，不論係性交、肛交、口交或生殖器之間皮膚接觸，就有機會經由血液、精液或其他體液感染性病。而性病一般可以分為細菌型性病，或者係病毒型性病。前者大多數都可以完全根治，而後者大多數未有藥物可以完全根治，但可以控制病情，例如愛滋病，性病疣（椰菜花）。所以你提及到嘅情況：情侶喺發生性行為嘅時候冇帶安全套，的確係會增加感染性病嘅風險。
不過通常性病都會有潛伏期同空窗期，唔會隔咗幾日就出現症狀。所以你嘅情況好大機會係因為抓傷，微絲血管出血，導致有紅色嘅點點。暫時可以再留意吓先，如果性器官持續有痕癢，甚至灼痛嘅感覺，咁就需要睇醫生啦！
如果過多一排你都係好擔心嘅話，建議你可以選擇去以下機構做免費嘅性病測試。
政府社會衛生科服務診所：各類型性病檢查（較全面，能即時知結果及比藥）
關懷愛滋：25歲或以下青少年、男男性接觸者－愛滋滋病病毒／梅毒／淋病／衣原體／丙型肝炎
香港愛滋病基金會：愛滋滋病病毒／梅毒／丙型肝炎
再思社區健康組織 (C.H.O.I.C.E.) ：愛滋病病毒／梅毒
*因為最近受疫情影響，建議前往之前，先到相關網站睇下機構有無開～
暫時可以先留意自己身體有無出現明顯病徵。如果已經出現下體痕癢、小便刺痛、分泌物異常、下體生粒粒等病徵時，就可以先及早求醫。不過如果未有出現明顯病徵的話，都建議考慮三個月（三個月已經過左大部分性病嘅空窗期）後，再一次過去做一個全面嘅性病檢測，會比較準確。
最後，都要提一提你，使用安全套唔只能夠避免懷孕，仲可以避免性病嘅傳播，保障雙方嘅健康。所以都希望你做足安全措施之後，先至進行性行為🫶🏻
如果去睇醫生嘅話，應該去社會衛生科定家計會睇醫生好啲
同埋如何應對別人異樣的眼光
Hello 你好啊
其實都無話邊到好啲嘅，主要睇番你嘅需求。係到分享多少少，希望可以幫到你。
社會衛生科可以提供較全面嘅性病測試，只要係符合資格嘅香港身份證持有者，可以免費去社會衛生服務核下診所求醫，有關社會衛生服務核下診所詳情可以參考以下網址：衞生署-診所及健康中心一覽表
家計會就提供梅毒、愛滋病毒、衣原體抗原及淋病DNA測試，需要收費同預約，可以參考以下網址：https://www.famplan.org.hk/zh/our-services/clinic-services/men-health/men-health-service/fee
其實都只係身體唔舒服，唔舒服就要睇醫生，係一件好平常嘅事，感染性病唔代表啲咩，加上而家醫學進步，好多嘅性病都可以透過治療而得到改善或者康復，另外都好欣賞你主動了解性病嘅資料，保護自己同另一半，去做性病檢查係一件好平常嘅事，例如有啲人可能準備生BB或者結婚之前都會去檢查嘅，亦都可以保障另一半，做性病檢查係絕對唔代表你可能過往性生活混亂，反而係一個負責任嘅表現。