性行為嘅頻率唔高，但係對上三次性行為之後唔知點解都會嘔吐。之前有上網查過原因，見到有啲資料提及可能係太深入，頂到子宮頸，就會導致作嘔。當時睇到都覺得安心少少，至少呢個係生理上的，咁食止嘔藥就得。
但係到到琴日，只係用手指進入，但之後都會嘔。開始擔心並且覺得呢個未必係生理嘅問題，諗緊會唔會關心理事。因為其實我係一個好驚嘔吐嘅人，覺得真係好辛苦。而自從其中一次喺性行為之後會嘔，我接落嚟每一次做完都會驚，擔心自己會唔會又嘔，最後又真係嘔咗。
自己本來同男朋友都算係慾望比較大嘅人，雖然男朋友對我而家嘅情況好體諒，同埋都會陪伴我，但我都好擔心長久落去，我係性呢方面嘅問題會影響到我哋嘅關係。同埋覺得好無助，要醫病都要知病因，但而家完全唔知點解會發生咁樣嘅症狀。
有諗過會唔會關之前食過避孕藥事。因為避孕藥對我影響好大，令到我個人好抑鬱，成日作嘔，所以我就停咗藥。但係停咗藥之後完全失去性慾，停藥距離依家已經三個月，性慾逐漸恢復少少，但遠遠比從來未食過藥嘅時候差。簡單啲講就係易飽咗好多。同埋我停藥之前發生性行為嘅時候係從來未出現過嘔吐嘅情況，停左藥之後先有呢個情況出現。
亦都有諗過會唔會係身體太差嘅關係。類似因為避孕藥嘅副作用同其他原因，之前病咗一兩個月，身體冇之前咁好，諗緊呢個因素會唔會都有關。
依家好擔心，唔知自己身體或者心理有咩問題，好驚手尾長，又怕好難好得返，近排影響到男朋友心情同我哋嘅關係。要睇醫生嘅話都唔知應該係睇婦科定sex therapy
多謝你睇到呢度，同埋抽時間去回應我嘅恐懼同擔心
Hello你好啊
首先回應返嘔吐方面先，除咗係因為插得太入之外，亦都有人會因為喺發生性行為之前食得太飽，導致消化不良嘔吐等情況出現，都有可能係因為性行為太激烈，所以會感到頭暈想嘔，都可以留意吓。不過見到你其實都好擔心呢個情況係由心理因素導致嘅，你講嘅情況都好有可能係令到你嘔嘅原因，因為之前發生過幾次性行為之後都有嘔，可能會將性行為同嘔吐連結埋一齊，就令到你每當發生任何形式嘅性行為，都會嘔吐。
喺避孕藥方面，睇返你而家已經停咗三個月藥，其實就唔會有太大影響嘅，見到你對於避孕藥嘅副作用都比較大，所以可以睇婦科醫生，了解咗嘔吐嘅原因先。都想問吓你係食避孕藥之前有冇睇過醫生先，因為唔係每個人都適合食避孕藥，例如有心臟問題、糖尿病、高血壓、免疫系統問題、肝臟問題嘅人都唔建議食避孕藥嘅，而且市面上有好多唔同牌子款式嘅避孕藥，每款含有嘅荷爾蒙劑量都唔同，所以都建議喺服用避孕藥之前，可以睇吓醫生，等醫生幫你檢查你嘅身體狀況係咪適合食藥，同埋適合食邊一款藥。
最後都想問下發生性行為前，有冇同另一半有共識，係咪大家商量好嘅，或者喺發生性行為前個情況係點嘅，都可以幫助你了解點解會嘔嘅。
多謝你嘅回覆！
我都擔心會唔會係我將性行為同嘔連結左一齊，如果係嘅話，我都唔知應該點做好 應該點樣「解除連結」。
喺避孕藥方面，我食之前有見過家計會護士，評估左係可以食的，當時就揀咗yaz 。但係食咗大概兩個月之後就開始好容易喊，到第三個月嘅時候就好抑鬱，所以就自己停咗藥。後來去睇家計會嘅醫生，佢話避孕藥都有機會會導致mood swing 同nausea，佢問我想唔想轉第二個牌子。但我同男朋友商量完之後，都覺得可能我嘅身體唔適合荷爾蒙方法嘅避孕，所以應該都唔會再試口服避孕藥。
同埋發生性行為之前，大家都係有共識嘅。但係去之前嗰日都會擔心會唔會又有嘔吐嘅情況出現，同埋做完嘅時候都會擔心呢個問題。但男朋友都對我好好，見到我唔舒服之後已經停咗，安慰我，陪我休息，送我返屋企。都好感激佢，同時都有啲自責。
依家覺得可能係因為自己嘅擔心導致嘔吐嘅發生，但我又搵唔到有咩方法可以令自己唔好諗，或者唔好驚。
再次多謝你的詳細解答！！
唔好意思吖