同男朋友喺2月17號做過，有戴套、戴套體外射精、事後灌水測試，分別喺2月28號、3月5號、3月7號用驗孕棒驗過無懷孕，其實個結果係咪已經好準確？但係我到而家都未嚟M……
Hello 知道你一定好擔心啦，見到自己月經咁遲都未嚟。
首先，見到你有用安全措施，亦都有檢查安全措施有冇出事（例如穿咗），事後亦都喺11日後驗過三次孕，咁其實只要你驗孕嘅時候係有跟足指示去做（例如用瞓醒第一次殊殊嘅尿去驗），懷孕嘅機會都係好低嘅，因為喺有跟足指示嘅情況下，尿液驗孕測試嘅準確度高達99%，所以都唔使太擔心係懷孕。
如果排除懷孕嘅情況嘅話，其實情緒壓力、生活作息、各種身體健康狀況等等都有可能會影響咗月經長短，有時會早啲嚟，有時會遲啲嚟。一般而言，月經周期維持喺21至35日都係正常可接受範圍嚟～
你會唔會最近都有飲食失調，或者好大好大壓力嘅情況？或者你會唔會都有食過同荷爾蒙分泌相關嘅藥物，或者抗生素等等？因為如果有嘅話都有機會會令成個月經周期延遲咗㗎～
另外，好耐未嚟m 都有機會係內分泌失調或者係有其他婦女或者子宮疾病，例如卵巢多囊症。所以如果你超過50日都仲係未嚟m嘅話，都會建議你可以睇醫生諮詢返醫生意見，可能檢查吓會唔會有相關嘅疾病，或者都可以開返催經藥俾你食等等。另外，你都可以去家計會做返個詳細嘅婦科檢查，咁就會更加放心喇～
希望幫到你啦 