有d長唔好意思!
講返少少以前，第一次係同ex做，全程有戴套，但因為插入好痛所以即刻停左，同埋當時可能撐得太痛有流到血，佢無射精。之後因為有尿道炎所以對性好卻步，有啲驚做完又有多次…
直到尋日同而家既bf想試，但淨係口交同手交
平時自己用手摸豆豆就有舒服感覺，無插入陰道。
但bf幫我摸下面就無咁高潮到，佢用口都係無乜大感覺，同埋我本身下面濕濕地，bf摸豆一陣就會好快乾，唔知點樣先可以再投入到，可以再濕d。
最疑慮係唔知同bf做下面會唔會又撐開流血，定之前同ex做過一次已經穿左處女膜而無野，下次係咪應該用手指入陰道慢慢試下個感覺先？
而且感覺我乾得太快，如果bf入來會唔會好難入到T.T
同埋好怕同bf做又有尿道炎問題！！
thank youu!!
Hello，好多謝你既分享。首先性行為有進入困難問題成因有好多，可以係生理或心理造成，但其實好多人都會有呢啲困擾，好多人都唔係一次就即刻得。估計你唔係有太多插入式性行為既經驗，所以係性行為時往往會壓力大或心情緊張，甚至乎可能因為對方性器官嘅size而造成壓力。而且性行為亦唔一定只係以「成功插入」為目標，以其他形式的性行為如口交、手淫等同樣可為雙方帶來歡愉。所以你地先嘗試口交同指交其實係一個好好既嘗試，亦可以繼續去做。你們可以先嘗試在前戲方面花多啲時間，例如：互相按摩、愛撫性器官等，而使用性玩具亦有助提升整體氣氛及增加刺激感，這樣可以讓大家身體能夠放鬆，在良好氣氛下才開始進行插入式性行為，咁樣都可以放鬆心情。
至於你話陰道潤較乾既問題，除咗可能因為緊張而令陰道分泌少而減低潤滑之外，其實每個人天生嘅分泌量都唔同，有啲人有機會本身分泌量比較少令到天生陰道冇咁容易變得潤滑。係下次進行插入性行為嘅時候，你都可以考慮買潤滑劑輔助，咁就可以提升返潤滑度，會比較容易啲令陰莖或手指插入陰道。而更多既前戲亦可以令心情更加放鬆，都可以提升陰道潤滑度。不過潤滑劑都有唔同特質同類型，你可以參考吓呢個Post：選擇潤滑劑
其實較進行少插入式性行為嘅人都係需要一定時間先適應到有外物進入陰道，包括陰莖、手指或性玩具等等。你地可以嘗試先用一隻手指慢慢插入陰道，當你覺得OK之後就慢慢增加手指嘅數量，慢慢試下令陰道擴張。當中仲可以慢慢試吓唔同角度或者頻率嘅抽插，去搵出合適自己嘅方法。亦都可以去性商店買一啲合適尺寸嘅性商品輔助，例如一啲棒狀嘅性玩具，都建議尺寸從小到大，慢慢嚟慢慢試。但記住如果用手指嘅話，就要先剪好指甲，同保持乾淨，如果唔係有機會會整傷陰道。
另外相比陰道，好多時陰蒂係會更加敏感，就好似陰莖嘅龜頭咁。所以其實刺激陰蒂係會更加有快感同更容易達致高潮。你地進行性行為時都可以試吓刺激陰蒂，可能更易有性滿足，或者喺前戲嘅時候多啲刺激陰蒂，令情緒同心情都更加放鬆，都可以增加陰道潤滑度，令陰莖相對容易插入。建議你同伴侶可以多啲溝通，傾吓大家喜歡點樣嘅性行為，創造一個大家都覺得安全而又舒服嘅環境，試吓探索唔同嘅部位或者行為，例如愛撫、親吻等等，都可以為你地帶來性歡愉。畢竟其實性行為有好多唔同形式，同樣可以達到性滿足，並唔需要執着於插入式性行為，而且並唔係個個人都係最喜歡插入式性行為。
而尿道炎既問題，呢個真係困擾既，所以係性行為前雙方都需要清潔好身體同性器官，保持性器官衛生，而且進行性行為前要使用安全套，因為守安全套係目前唯一可以預防懷孕同病菌既安全措施，全程正確使用安全套，都可以減低病菌進入尿道嘅機會。除左性行為前後做好清潔，多飲水、排尿，係日常生活中嘅小習慣都可以幫助保持成個陰部嘅健康，例如著棉質嘅底褲同埋鬆散嘅下身衣物、多飲水避免忍尿、每日溫柔溫和地清潔、去廁所之後由前向後（由尿道口向肛門）而輕輕印嘅方式清潔等。日常護理做得好，尿道環境較為健康，抵抗力都會加強。
希望可以幫到你。