你好 想問下上面驗孕棒嘅結果係有定無 因為女朋友好耐無黎m
你好，收到你既問題，先解答左對你照片既疑惑先。從照片所睇驗孕棒嘅結果係陰性，即係沒有懷孕，按照結果係唔使太擔心。不過因為唔清楚你地最後一次性行為既日子，同埋照片所做既檢測係性行為後幾時去做，所以唔可以單憑結果去定奪有無懷孕。
如果自行驗孕其實可以喺性行為後11日進行驗孕，因為驗孕棒係透過檢測尿液中嘅hCG (人絨毛膜促性腺激素)含量，呢個激素會係受精卵著床後開始大量分泌，而一般受精著床呢個過程需要6-9日，所以係性行為後7日使用驗孕棒的話會有初步嘅結果，而係11日後或者預計經期嘅日子驗孕結果會更加準確。所以你地可以睇返最後一次性行為既日子，然後係第7日進行驗孕，會有初步嘅結果。想最準備，就係第11日驗孕。
而未有月經除左懷孕亦可以有好多原因，月經本身就係可以因不同外內在因素影響，例如生病、服食藥物、情緒、有壓力、生活作息改變等，都會影響荷爾蒙水平，從而影響到月經周期，所以即使月經日子同預期嘅有差距都唔需要太擔心，可以留意吓女朋友有無上述提及嘅生活變化，再觀察一下。如果驗孕結果仍然係陰性，但又月經遲來一段時間，可以搵醫生檢查一下，睇下會唔會有其他原因影響。
希望幫到你解決問題啦！