一時控制唔到自己慾望，去左召妓，現在感到極度後悔與恐懼，亦很討厭自己為何做出這行為。
召妓時有帶安全套口交，之後插入了妓女下體若數分鐘，最後便拔出，其後脫下安全套，以手淫方式射精。
馬上回家洗澡後感到馬眼位置刺痛，清洗和小便亦感到刺痛，洗後亦仍然有刺痛感，膀胱亦有隱隱作痛。非常害怕得到性病，而曾經有插入行為亦在網上搜尋後非常害怕會得到性病，如梅毒。
想請問一下因有插入性行為，拔出時發現安全套有走位，根部位置不是完全套藉，而且無牌子安全套由妓女提供，非常害怕。而且在手淫時會否將接觸到的體液塗在陰莖上，令先前帶安全套變得徒勞，令自己感染性病。
現在感到極為害怕和後悔，亦不知道要等多久才可以進後性病檢驗。
妓女的手在洗澡時接觸到我的皮膚、我在肛門附近有傷口，會否因此得性病？
Hello 明白你好擔心自己感染到性病。
呢度首先講少少性病嘅相關資訊先。性病主要嘅傳播途徑透過體液，例如精液、腸液、尿道球腺分泌（Pre-cum）、陰道分泌、血液，接觸過身體比較薄嘅黏膜組織，例如肛門、口腔、陰道，或者傷口先傳播到病毒。所以，如果只係沖涼嘅時候單單只係用手接觸過你嘅皮膚，即使你附近有傷口都好，而佢係冇傷口嘅話，都係唔會傳染到性病嘅。除非個位性工作者嘅手都係有流血嘅傷口，咁先有機會傳染到。而如果你進行性行為嘅時候，全程都有好好咁帶好安全套嘅話，都係唔會傳染得到性病嘅。而即使最後除咗安全套先再以手淫方式射精，如果對方雙手並無開放式傷口，或者係類似疱疹或椰菜花（性病疣）嘅病變組織，咁感染性病嘅風險都會比較低。
但係，你提到你發覺進行插入式性行為嘅時候，安全套有走位，而你都提到會有體液接觸到你陰莖，雖然唔係太清楚詳細情況係點，但係咁樣的確係有傳染性病嘅風險。
而即使你未必清楚個安全套嘅牌子係咩都好，其實都有一啲步驟可以檢查到安全套係咪安全可靠，例如可以留意下包裝上邊有冇過期日，如果有嘅話可以留意吓過咗期未、亦都可以留意吓安全套有冇足夠嘅潤滑劑，或者喺結束之後做一啲到水測試，睇吓有冇穿漏嘅情況。如果真係擔心嘅話，都會建議自己去可靠嘅商店購買，可以留意埋尺寸係咪適合（歐美/香港牌子通常計闊度，即係充血陰莖根部圓周除2，而日本牌子多數計直徑，即係充血陰莖根部圓周除以3.14），到時用返自己嘅安全套就更加放心。同埋帶嘅時候，都可以留意下有冇分清楚安全套正反面，同埋要將前端貯精囊空氣擠出，將安全套展開戴到落底，咁就可以減少安全套移位嘅機會。
但係，會傳染到性病嘅前提係對方都有性病。但係我哋都唔應該預設左對方從事性工作，就一定會有性病。相反，正正因為對方從事性工作，佢哋好多時都更加着緊自己嘅身體，一來都關乎自己身體健康，二來亦都會影響佢哋謀生。
當然，小便時有刺痛感，或者陰莖有灼痛嘅感覺，可能係某啲性病嘅特徵，不過其實好多性病都有潛伏期，未必咁快就會出現病徵，唔會呢頭發生完性行為之後馬上就出現病徵。另外，呢啲刺痛嘅感覺亦都可能係尿道炎等等嘅情況。
但係，其實畢竟你始終都有用到安全套，而且並冇直接嘅體液接觸，所以傳染到性病嘅風險其實比較低，所以都唔使太過擔心。
如果真係擔心嘅話，你都可以考慮喺有可疑嘅性行為之後三個月進行性病檢測。你可以去私家醫療服務中心或者衞生署社會衞生科診所進行測試。唔同嘅非政府機構，例如關懷愛滋、香港善導會水銀星三號、香港愛滋病基金會、再思社區健康組織等等都有提供性病測試。而因為性病係有空窗期的，一般性病嘅空窗期都係三個月內，所以就算真係感染到有性病，而家即刻去驗都係冇咁快驗到嘅。所以如果擔心嘅話，都可以喺三個月之後去相關機構做個詳盡嘅性病檢查。
而其實而家好多性病都已經可以完全根治，部份性病即使無法根治，但仍然都可以治療得到，可以治療到身體內嘅病毒量降到不可檢測嘅水平(Undetectable)，到時即使體內有病毒都唔會透過性接觸傳播到比其他人(Untransmittable)，亦即係所謂嘅U=U。所以最後即使最後真係檢測到有性病，都唔需要過於焦慮。如果有需要嘅話，都可以嚟搵返我哋，睇吓我哋有冇咩可以幫到你。
最後都提醒返，下次進行性行為，無論係搵性工作者，定係同任何其他嘅人都好，如果唔清楚對方接觸過咩人嘅話，都可以諗吓會唔會可以做足啲事前功夫，例如自備或者好好咁用安全套、或者了解吓對方會唔會有做性病檢測嘅習慣等等，咁都可以令你更放心。
希望都解答到你嘅困擾。
表達不太清晰，十分抱歉！插入時有帶安全套，插了數下拔出時，在拔出的動作見到安全套稍有前移，原先進入時套到陰莖根部底，插出時安全套向前了，令未能包著較後段和根部，覆蓋著龜頭和大半的前段。
我自行脫下安全套後，便用同一手進行手淫至射精。請問這樣會將陰道沾在安全套上的體液，在脫下安全套和手淫時接觸到陰莖，導至感染性病嗎，非常後悔和害怕。
hello你好啊
因為喺除安全套後，手可能有掂到陰道沾在安全套上的體液，然後再接觸到陰莖，雖然唔可以話係直接接觸，但都會有風險嘅，所以都建議可以喺性行為之後三個月進行性病檢測。