Hello 未夠16歲 同男朋友sexy咗 未過72小時 想問下可以點做 我而家好驚有咗 佢話佢冇射但係插入去嗰陣前面係濕 插完幾下就炆返出嚟
Hello～首先，根據香港法例，男性同未滿16歲嘅女性發生陰道交係違反法例嘅，需要附上法律責任。雖然對方話冇射到，但係因為有插入呢個行為，加上陰莖係性興奮嘅時候會分泌尿道球腺液，內含少量精子，都有機會導致懷孕。如果想保險啲嘅話，建議喺72/120小時內服用事後丸。因為事後丸喺香港係醫生處方藥物，所以需要喺私家診所/公立醫院/家計會等機構購買。千祈唔好喺冇醫生處方嘅藥房購買，因為藥效未必有保證。同埋事後丸有分72同120小時兩種，需要醫生根據你嘅身體狀況去決定你應該食邊隻藥。
雖然你未滿16歲，但係可以放心，醫生唔會喺未經你同意嘅情況下通知你嘅屋企人或者報警。如果去家計會嘅話，姑娘可能會問多少少關於性行為過程嘅問題，主要都係擔心喺呢個過程裏面出現咗違背自身意願嘅情況，或者有構成性暴力嘅行為等等，都係想保護返你。佢哋唔會無端端有你屋企人嘅電話，所以唔需要擔心佢哋會通知你嘅父母，或者報警拉你男朋友。
因為事後丸係高劑量嘅荷爾蒙藥物，所以有機會會出現不規則出血，頭痛腹痛等等嘅副作用，亦有機會令到月經延遲，擾亂你之後嘅月經周期。所以如果唔考慮服用，可以喺性行為之後嘅7-11日進行驗孕，通常7日後會有初步嘅結果，11日後先至驗嘅話個結果就最準確。
最後都希望你同你嘅另一半可以喺合情合法合理嘅情況下先至進行性行為。當雙方都有足夠嘅知情度同埋承擔力嘅時候，就可以更加好咁保障大家嘅安全同埋健康啦！