平時月經都算準，臨近預算既排卵期都會多左好似蛋白狀既白帶，咁想請問係咪就算排卵期遲左早左，都可以用白帶既狀態大概知道係咪排卵期？ 唔該
多謝你嘅提問～
白帶嘅狀態會受荷爾蒙同身體狀況影響，如果係白色透明而冇味，咁佢就係健康嘅白帶～
佢嘅量一般嚟講會喺排卵期、月經前同妊娠期增加，呢個變化係嚟自體內雌激素上升影響，所以如果有其他因素（例如性興奮、服用避孕丸同配戴子宮環）令到雌激素水平有變化，都有機會令白帶量增加～
而喺中醫角度，個人濕邪（食得多生冷、甜食、牛奶、啤酒，吹得冷氣多甚至外在環境潮濕都可能造成濕邪）都會令白帶量增加～
所以見到白帶嘅量增加，都唔能夠斷定係正值排卵期架～並唔係每一個人嘅月經周期都穩定，排卵日亦唔未必每一個月都一樣，可以因為上述提及嘅原因改變。所以如果你係想知道自己嗰一段時間係唔係排卵期，我哋就唔建議用白帶量去判斷，市面上有一啲排卵棒，係透過檢測黃體生成素 (LH) 呢個關鍵嘅生育荷爾蒙水平變化，去確定每個月經週期最容易受孕嗰2日。簡單啲嚟講排卵棒嘅結果係顯示最容易受孕嘅日子，即係排卵期前後嘅日子。
希望呢個回答幫到你～ 