宜家同男朋友一齊咗幾年，啱啱一齊嘅時候知道佢以前有拍過一次幾個月嘅拖，雖然一開始有啲在意，不過好快就接受咗，唔再在意。
我第一次係同宜家嘅男朋友發生，而男朋友幾年嚟都話冇同前女友發生過性關係(係由我好似講笑咁chok料嘅方式得翻嚟嘅答案)，我就覺得好慶幸，直到最近講起前女友嘅野，我開始係到諗，佢地關係應該有發展到去有性行為先係，之後問咗男朋友，佢承認咗係有過，不過唔想我唔開心先呃我話冇，男朋友見我唔開心，同我講同我一齊係開心過以前好多，好中意我所以我地先一齊到咁耐，要放眼我地以後等等嘅野，不過真係安慰唔到我，我知道咗佢地有過之後真係諗起親都忍唔住喊，我唔介意佢以前有拍過拖，但我介意佢嘅性器官有其他人用過。
會唔會其實佢一開始冇呃我我反而冇咁接受唔到呢? 我知問完，佢話有過，我會唔開心，但我都係問咗，係自己犯賤，係我自己問題，所以我想改變嘅係自己，我到底可以點樣接受呢件事? 我都唔知時間可唔可以沖淡一切
我曾經都好似你咁
但諗真啲
唔通一識就問人有冇性經驗？ 
有就肯定唔同佢拍拖？
無論男定女，你都冇可能知道自己面前嗰個人係咪同你一世㗎嘛，所以我覺得將第一次留畀「嗰個人」根本唔可行，不過咁並唔等於鼓吹隨便同人發生關係
至於以前嘅事，其實都係一樣，都係計較唔到咁多
係唔係處男 真係咁重要咩？
唔通因為佢唔係處男就唔鍾意佢？
當然唔係話要接受濫交，但愛一個人 有好多因素，如果淨係諗對方係唔係處男，咁樣係愛咩？
又或者當你第日有第二個男朋友 純粹舉例，當然衷心希望你而家能夠永遠幸福啦
如果佢又介意你俾人用過，咁你會點諗呢
我講嘢係直接啲 
唔啱聽嘅話唔好見怪
Hello多謝你同我哋分享你同男朋友嘅經歷
我見到喺呢件事入面，除咗你覺得被蒙在鼓裏，對男朋友多咗唔信任之外，亦都有自責嘅情緒，都想就住呢件事去改變自己要去接受。
見到你最着緊嘅點係「介意佢嘅性器官有其他人用過」，可以試吓問自己其實點解會介意，例如係因為驚有性病風險？覺得佢呃你？定係你希望另一半係從來冇發生過性行為？以上提及嘅原因並無對錯，因為每個人嘅接受程度都唔一樣，所以純粹個人嘅睇法～就例如有啲男性都會要求自己嘅結婚對象係冇發生過性行為，咁如果真係有咁樣嘅另一半出現，其實呢件事並無任何問題。
咁當然而家你哋係一齊緊嘅狀態知道呢件事，係會好突然。可能你都諗緊點樣去說服自己接受呢個事實，或者其實說服自己去接受呢個過程對你嚟講好困難，但可能因為有愛所以你會想同呢個人繼續一齊落去。與其自己去努力接受，有冇打算會同男朋友傾吓呢件事？因為都見到你男朋友其實好重視你，亦好顧及你嘅感受，同時都希望同你繼續行落去。如果你都有同樣嘅諗法，其實互相溝通都係一件好重要嘅事。了解大家嘅諗法，一齊去為段關係而努力，相信比起你自己一個去承受更有力量。你可以同佢傾吓你嘅擔心，例如如果係擔心有性病嘅問題，可以一齊去做性病檢查。明白呢件事需要一啲時間去消化，無論係你定係男朋友都好，除咗時間沖淡之外，如果大家都將諗法擺喺心嘅話就更加容易製造其他誤會，所以一開頭可能處理呢件事嘅時候仲有壓力，但希望你同男朋友，或者其他朋友傾呢件事嘅時候，都可以冇咁大壓力啦