打飛機經常幾分鐘（3-5）就射左
嘗試就快要射就停一陣再繼續但唔享受
係唔係早洩？如果係點算而且點解
本人15歲一日打一次係唔係有關而且係唔係正常？
（PS 打飛機有時睇AV但係有時係J學校既女仔其實係唔係有問題）
你會唔會係隻手太快/太緊啊？
你有冇諗過自己享受嘅係乜嘢先？係射精嘅感覺？定係打飛機嘅過程？
至於打飛機嘅頻率其實因人而異嘅，只要你冇覺得唔舒服同埋冇影響到其他人就可以㗎喇，冇話正唔正常嘅
Hello 咁你好似係有4個問題，咁我就嘗試逐個分別回答啦。
1 自慰3-5分鐘就射精係咪早洩？
其實醫學上至今都冇一個統一定義咩叫早洩，部份專家定為係受到刺激開始約1分鐘內射精，另外亦有講法係開始性交後15秒內射精。成因亦都有好多，可能係心理壓力，可能係本身生理因素。其實除非係好困擾到你性生活，如果唔係其實自慰時間長短係因人而異，都好難話係早洩。好多時我哋睇AV見到啲角色可能好耐先射精，其實個啲都係戲劇，就好似平時睇韓劇美劇，唔可以完全當真。
2 可以點延長時間先射精？
其實都有啲訓練方法可以延長時間。呢度都可以教你做一個凱格爾運動，最主要就係訓練盆底肌嘅，可以訓練持久度。一開始，你需要感受下盤底肌先，你可以試下係屙尿嘅期間嘗試截斷尿液，果一個肌肉就係盤底肌啦。之後你就可以嘗試收緊盤底肌，維持5秒，然後放鬆，再收緊5秒，再放鬆，如此類推，可以先嘗試做10組先，當你熟悉嘅時候就可以慢慢加秒數同埋做多幾組。
另外，你都可以試下 「斷續刺激」治療法。首先，刺激陰莖直到勃起，然後持續刺激到想射精，當你覺得就射嘅時候，就要即刻暫停，用30秒時間令自己冷靜落嚟。當你覺得唔再係想射精啦，就可以繼續刺激，然後到想射嘅時候再停止，你可以重複幾次，咁樣就可以令你射精嘅時間延遲。
3 一日自慰一次係唔係正常？
有啲人可能每日自慰幾次，都有啲人可能一個月都未必有一兩次，因人而異。就好似上面位朋友講咁，自慰頻率冇分正唔正常，只要你冇感覺到唔舒服或者影響到自己或者影響到他人嘅話，就已經可以。
4 有唔同嘅自慰嘅對象有冇問題？
其實好多人都會有唔同嘅性癖好，未必只係睇av嚟自慰，例如有啲人可能用聲音，相片，文字閱讀都可以為佢哋帶嚟刺激感，只要唔會影響他人都冇問題嘅。至於對象係學校嘅女同學，咁就需要留意自己嘅眼神/言語/行為會唔會為同學帶嚟唔舒服或者不安，如果你作出嘅言語/行為令同學覺得恐懼或者困擾，就有機會構成性騷擾。