初次經驗不成功,會唔會有懷孕機會?

我同男朋友最近去咗旅行,咁我自己都有expect會同佢發生性行為(我一次都未試過)。雖然我知男朋友係一定會用安全套,但自己都擔心,所以喺諮詢醫生意見情況下,我就喺9/3/2023開始食避孕藥,而我地喺16號嘗試進行第一次嘅性行為。

男朋友勃起嘅時候,已經戴咗套,而佢嘗試插入黎,我痛到一個點,而最後我地無繼續進行任何野。跟住我就發現自己under有啲血,我諗應該係個處女膜破咗?

隔咗兩日,我地再試,佢有嘗試插入,但我估應該未去到一個『啱』嘅位置,因為佢一嘗試用力我就好痛,而佢都有話我好緊,跟住我地試過好多唔同位置都唔得,所以就冇繼續。

我好介懷呢件事,我覺得係我太過冇經驗而搞到咁,令對方好掃興,我知佢係擔心我,亦知我好緊張,佢亦冇怪我任何野。

但我完全唔知道邊個位置先啱,而我亦成日好擔心會唔會懷孕。佢全程戴住套先接觸我下面,而佢都冇射過,其實咁樣懷孕機會係咪好細?同埋我好想請教下點樣先可以衝破到「痛」嗰一下?

Hello多謝你同我哋分享第一次發生性行為嘅經歷,相信當中有一啲情況都令到你好困擾同無助,但喺解釋之前都想話俾你聽,係呢件事上面你並冇做錯嘅地方,好多人即使係發生過好多次性行為都未必對自己嘅身體有好多嘅了解。亦都想話俾你聽好多時係因為緊張,所以會導致你提及嘅情況,但其實同時都代表你重視呢一樣嘢,所以唔需要太擔心,唔好覺得自己嘅表現唔好:relieved:

首先有關於一插入就覺得痛嘅問題,如果係未曾發生過性行為,再加上緊張,都會令陰道肌肉緊繃,所以會出現插入嘅時候覺得痛嘅情況。另外亦都可能係因為陰道入口位置未夠濕潤,所以進入時會覺得痛。建議喺性行為前嘅前戲可以做足啲,接吻,撫摸,或者其他身體接觸都有機會令陰道位置更加濕潤。另外比起直接用陰莖插入,可以試吓請男朋友先用手指插入,一方面除咗可以有助搵到陰道口嘅位置,亦可以慢慢通過手指插入輔助陰道擴張,同時舒緩緊張感。如果呢個時候男朋友搵啱洞口,而你都覺得手指進入時唔痛,都可以給予適當嘅回應,比男朋友知道呢個動作係舒服嘅,係可以繼續進行嘅。

至於出血嘅情況,大機會係因為陰莖進入陰道時,「處女膜」撕裂導致嘅出血。比定一個心理準備你,有機會出血嘅情況喺下一次陰莖進入陰道嘅時候會再出現,一般情況下,只會出現五次以下。如果出血嘅情況伴隨着強烈嘅痛楚,有機會係緊張而造成陰道痙攣,或者係陰道口未夠濕潤就插入而造成嘅出血。如果確保唔係後者而造成嘅出血同埋痛楚,就可能需要更多前戲去舒緩緊張感,亦可以使用潤滑劑,令之後無論係手指/陰莖插入嘅時候都更容易。

而點樣搵到一個「啱」嘅位,相信呢樣嘢都需要時間同伴侶慢慢發掘,始終性行為係兩個人嘅事,如果有足夠嘅溝通,互相鼓勵,相信你哋會慢慢發掘到令大家舒服嘅方法。

最後就係有關意外懷孕嘅問題,因為都見到你開始食避孕藥,如果身體冇出現異常嘅情況,例如嘔吐或腹瀉,其實藥效已經喺身體發揮,即使唔使用安全套發生性行為,意外懷孕嘅機會都非常低。而且見你提及整個性行為過程都有使用安全套,男朋友亦冇射精嘅話,基本上唔會有意外懷孕嘅機會。但都可以提醒你,食避孕藥可以有效避免意外懷孕,但未能夠避免性病傳染。

希望以上回覆幫到你啦:smiling_face_with_three_hearts:

1個讚